პარლამენტის თავმჯდომარე დავით ბაქრაძემ დღეს, სახელმწიფო აუდიტის სამსახურის თანამშრომლებს ახალი ხელმძღვანელი ლაშა თორდია წარუდგინა.

ბაქრაძის განცხადებით, ახალი ხელმძღვანელი პარლამენტში ადამიანის უფლებათა დაცვის კუთხით მუშაობდა და მას დიდი გამოცდილება აქვს.

„აუდიტის სამსახური ასრულებს ძალიან მნიშვნელოვან ფუნქციებს და დღევანდელ ეტაპზე განსაკუთრებით მნიშვნელოვანია, რომ ეს სამსახური არა მარტო იცავდეს და აღასრულებდეს კანონს, არამედ აკეთებდეს ამას ისე, რომ საზოგადოებაში გაჩნდეს რაც შეიძლება ნაკლები კითხვა. ამ ეტაპზე განსაკუთრებით მნიშვნელოვანია მეტი კომუნიკაცია საზოგადოებასთან, პოლიტიკურ პარტიებთან, არასამთავრობო სექტორთან, სამოქალაქო საზოგადოებასთან. ვფიქრობ, რომ ახალი ხელმძღვანელი, რომელიც წლების მანძილზე სწორედ ადამიანის უფლებათა დაცვის კუთხით მუშაობდა პარლამენტში,  შეძლებს ამ საქმის გაგრძელებას“,- განაცხადა ბაქრაძემ.

გუშინ, პარლამენტმა 83 ხმით 2 ის წინაამდეგ, სახელმწიფო აუდიტის ხელმძღვანელად ლაშა თორდია დაამტკიცა.

თორდიამ, ლევან ბეჟაშვილი შეცვალა, რომელმაც თანამდებობა საკუთარი ნებით დატოვა. როგორც ბეჟაშვილმა განაცხადა, კახეთში მოსახლეობას განსაკუთრებული ზრუნვა და გვერდით დგომა სჭირდება და სწორედ ამიტომ დატოვა მან თანამდებობა.

Internet.ge