ომში დაღუპულ მეომართა ხსოვნის კვირეულთან დაკავშირებით დიასპორის საკითხებში საქართველოს სახელმწიფო მინისტრმა მირზა დავითაიამ განცხადება გაავრცელა, რომელსაც “ინტერნეტ.ჯი“ უცვლელად გთავაზობთ:

“საქართველოს ქალაქები 2008 წლის აგვისტოს ომში დაღუპულ მეომართა ხსოვნის კვირეულის ფარგლებში  მიძღვნილმა ღონისძიებებმა მოიცვა.

აქციები ტარდება საზღვარგარეთაც. თქვენ, უცხოეთში მცხოვრები თანამემამულეები მთელი მსოფლიოს მასშტაბით აპროტესტებთ რუსულ აგრესიას.

4 წლის წინ თქვენს, დიასპორის თავდაუზოგავ აქტივობებს უდიდესი მნიშვნელობა ჰქონდა, რათა მსოფლიო საზოგადოების ყურადღების ფოკუსირება მოგეხდინათ თქვენი ქვეყნის წინააღმდეგ განხორციელებულ აგრესიაზე. თქვენ, მაშინაც და მთელი ამ წლების მანძილზე ფასდაუდებელი სამსახური გაუწიეთ სამშობლოს და მოახერხეთ ჩვენი მეგობარი ქვეყნების და ერების სოლიდარობის  ჩვენი ქვეყნის ირგვლივ კონცენტრირება.

დიდი მადლობა მინდა გადავუხადო თითოეულ თქვენგანს, რომლებმაც, მიუხედავად უცხოეთში არსებული მძიმე სამუშაო განრიგისა, მოახერხეთ და ამა, თუ იმ ფორმით შეუერთდით იმ ხსოვნის კვირეულს, რომელსაც საქართველო მიმდინარე კვირის მანძილზე აღნიშნავს. თქვენ კიდევ ერთხელ დაგვანახეთ, რომ უცხოეთში მცხოვრები ჩვენი თანამემამულეები, ერთიანი განუყოფელი ნაწილი ხართ ჩვენი ერთიანი ეროვნული სხეულისა.

მიუხედავად იმისა, რომ ჩვენი ოკუპანტი ქვეყანა მაინც ახერხებს ჩვენში მოძებნოს ცალკეული ადამიანები, რომლებიც მათთან უნისონში დაადანაშაულებენ საქართველოს იმ დიდ ტრაგედიაში, რომელიც ჩვენს ქვეყანას 4 წლის წინ   დაატყდა თავს, ქართველი ხალხის უდიდესი უმრავლესობა რჩებით  ქვეყნის და ეროვნული იდეალების ერთგული, საღად აფასებთ მომხდარსაც და მომავალ გამოწვევებსაც. ქართველი ერი და მისი დიასპორა ერთგული რჩებით საქართველოს დამოუკიდებლობის და სახელმწიფოებრიობის იდეისა.

ქართველი ერის ეს ერთსულოვნება, რასაც ჩვენ ამ დღეებში ვხედავთ, მიმტკიცებს რწმენას, რომ საქართველოს მშვიდობიანი ბრძოლა ერთიანობისა და ნათელი მომავლისთვის სულ მალე ჩვენი ქვეყნის გამარჯვებით დასრულდება,”- ნათქვამია განცხადებაში.

internet.ge