კოალიცია „ქართული ოცნების” ლიდერი ბიძინა ივანიშვილი უკანონო შემოწირულობების განხორციელებისთვის 20 243 827 ლარით დაჯარიმდა. თბილისის საქალაქო სასამართლოს გადაწყვეტილებაზე კომენტარი „ინტერნეტ.ჯი“-სთან ივანიშვილის ადვოკატმა შალვა თადუმაძემ გააკეთა.

მისი თქმით, სასამართლომ მოქალაქე ივანიშვილი სამართალდამრღვევად სცნო . საქმე ეხება სახელმწიფო აუდიტის ბრალდებას, რომლის მიხედვითაც „ქართული ოცნების“ ლიდერმა საკუთარი საბანკო ანგარიშებიდან გამოტანილი თანხა ნაღდი ფულის სახით "ქართული ოცნებისთვის" შემოწირულობის სახით გამოიყენა.

თადუმაძე სასამართლოს მიკერძოებაში ადანაშაულებს და აცხადებს, რომ დღეს მიღებულ გადაწყვეტილებას ივანიშვილის ადვიკატები სააპელაციო სასამართლოში გაასაჩივრებენ.

„საქალაქო სასამართლოს გადაწყვეტილების გასაჩივრებისთვის 48 საათი გვაქვს. დღეს მიღებული გადაწყვეტილებით, 20 243 827 ლარი ერთ კვირაში უნდა დაიფაროს“,- აღნიშნა ადვოკატმა.

შეგახსენებთ, ფინანსური მონიტორინგის სამსახურის ინფორმაციით, 2012 წლის განმავლობაში, გაცხადებული პოლიტიკური და საარჩევნო მიზნების მქონე პირებმა ბიძინა ივანიშვილმა და კახი კალაძემ კუთვნილი საბანკო ანგარიშებიდან, ნაღდი ფულის სახით, დანიშნულების მითითების გარეშე, სოლიდური თანხები გაიტანეს. დასახელებულ პერიოდში ბიძინა ივანიშვილმა გაანაღდა 5.552.135 ლარი, ხოლო კახი კალაძემ 3.388.992 ლარი.

რაც შეეხება კახი კალაძეს მას განაჩენი გუშინ გამოუტანეს. კოლიციის მაჟორიტარობის კანდიდატი თბილისის საქალაქო სასამართლომ  16 944 960  ლარით დაჯარიმა. ასევე დაყადაღდა მისი ქონებაც.

internet.ge