„ქართული ოცნების“ ყოფილი წევრი გუგა კოხრეიძე ივანიშვილის გარემოცვას პირად კეთილდღეობაზე ზრუნვაში ადანაშაულებს.

როგორც „ინტერნეტ.ჯი“-ს სამტრედიელმა კოხრეიძემ განუცხადა, კოალიციას არც ერთ დაპირებაზე კონკრეტული პროექტი არ აქვს.

„ბიძინა ივანიშვილს, როგორც მეცენატს ვაფასებდი, ამიტომ გადავწყვიტე მის პარტიულ აქტივში გაწევრიანება. თუმცა რაც ბრწყინავს ოქრო არ არის. მისი გარემოცვის ზრახვები მალე გაიშიფრა.  საქმეში გამოიკვეთა, რომ ისინი არა ქვეყნის კეთილდღეობისთვის, არამედ საქართველოს მთავრობაში მოსასვლელად იბრძვიან. ანუ მათი მთავარი ამოცანა არა ხალხზე ზრუნვა, არამედ მიხეილ სააკაშვილის ჩამოგდებაა. ისინი მოსახლეობას მხოლოდ დაპირებებს აძლევენ, მათ შესრულებაზე კი უარს აცხადებენ“,- განაცხადა კოხრეიძემ.

„ინტერნეტ.ჯი“-სთან საუბრისას სამტრედიის მკვიდრმა კოალიციის განწყობებზეც ისაუბრა.

„ქართული ოცნების“ პრორუსულობა თვალშისაცემია. სამტრედიაში, „ქართული ოცნების“ წარმომადგენელთა განწყობა ერთი-ერთში იმეორებს ბიძინა ივანიშვილის რუსეთთან დამოკიდებულებას. პირად საუბრებში ჩემი თანაგუნდელები რუსეთის მიმართ კეთილგანწყობას არც მალავდნენ. შეიძლება ხელისუფლების ქმედება არ მოგწონდეს და შეეცადო მის შეცვლას, თუმცა ეს საკუთარი ქვეყნის გაყიდვას და რუსეთთან, რომელმაც მოაწყო ეთნოწმენდა, ჩახუტებას არ ამართლებს“,- აღნიშნა გუგა კოხრეიძემ. 

internet.ge