საქართველო-რუსეთის საზღვართან, დაღესტნის მონაკვეთთან საქართველოს შინაგან საქმეთა სამინისტროს შეიარაღებული ჯგუფი დევნის ოპერაციას ამ დრომდე ახორციელებს. ამის შესახებ შინაგან საქმეთა სამინისტრო სპეციალურ განცხადებას ავრცელებს.

მასში ნათქვამია, რომ "საქართველო-რუსეთის საზღვართან, დაღესტნის მონაკვეთთან საქართველოს ტერიტორიაზე, აღმოჩენილია შეიარაღებული ჯგუფი. შინაგან საქმეთა სამინისტროს მიერ ხორციელდება აღნიშნული ჯგუფის დევნის ოპერაცია. შსს-ს ქვედანაყოფებს ბლოკირებული აქვთ ხეობა. 

საქართველოს მოქალაქეთა უსაფრთხოების უზრუნველსაყოფად ყველა ზომები მიღებულია. დამატებითი დეტალების შესახებ საზოგადოება მოგვიანებით იქნება ინფორმირებული", -ნათქვამია შინაგან საქმეთა სამინიტროს მიერ გავრცელებულ განცხადებაში. 

საქართველო-რუსეთის საზღვართან, დაღესტნის მონაკვეთთან მიმდინარე შეიარაღებული ჯგუფის დევნის ოპერაციასთან დაკავშირებით, თელავში, კახეთის სამხარეო პოლიციის შენობაში საგანგებო თათბირი ჩატარდა.

თათბირს საქართველოს პრემიერ-მინისტრი ვანო მერაბიშვილი ხელმძღვანელობდა, რომელსაც საქართველოს შინაგან საქმეთა, იუსტიციისა და თავდაცვის მინისტრები ესწრებოდნენ. მათ ვანო მერაბიშვილს საქართველო-რუსეთის საზღვართან მიმდინარე დევნის ოპერაციის შესახებ დეტალური ინფორმაცია მიაწოდეს და მისგან სპეციალური დავალებები მიიღეს. 

Internet.ge