მმართველი გუნდის წევრის, აკაკი ბობოხიძის მტკიცებით, ყაზბეგის მოსახლეობა თუ გაზმომარაგებასთან დაკავშირებით, ხელშეკრულებას გააფორმებს, მათ ბუნებრივი აირი შეუფერხებლად მიეწოდებათ.

ამის შესახებ პარლამენტის დღევანდელ პლენარულ სხდომაზე, ბობოხიძემ მას შემდეგ განაცხადა, რაც „ქრისტიან–დემოკრატების“ ლიდერმა, გიორგი თარგამაძემ ყაზბეგის გაზმომარაგება, მთელი წლის განმავლობაში მოითხოვა.

ბობოხიძის ინფორმაციით, მთავრობა, ყაზბეგისთვის გაზის ღირებულებას   ზამთრის პერიოდში აფინანსებს.

„რაც შეეხება ზაფხულს, ელემენტარული ყოფითი მოხმარებისთვის,  წინააღმდეგი არავინ არის, რომ ყაზბეგს გაზი მიეწოდოს.  როგორც კი, მოსახლეობა ხელშეკრულებას გააფორმებს და იმ მინიმალურ ტარიფს გადაიხდის, რომლიც ზაფხულში გაზის მოხმარებას სჭირდება, მეორე დღესვე, ყაზბეგში გაზი ჩაირთვება. სახელმწიფო დახმარებას მაშინ აკეთებს,  როდესაც, ის ყველაზე მეტად სჭირდება რეგიონის. სახელმწიფოს არც უთქვამს, რომ ვინმეს გაზი უფასოდ, მთელი წლის განმავლობაში ექნება“, – განაცხადა მან.

დეპუტატის განმარტებით, ყაზბეგის მოსახლეობას, ზაფხულის განმავლობაში, გაზის მიწოდებისთვის მინიმალური გადასახადის 5-6 ლარის გადახდა მოუწევს.

Internet.ge