ლაფანყურში განხორციელებული სპეცოპერაციისას გარდაცვლილი სოლომოს წიკლაური მშობლიურ სოფელში დღეს დაკრძალეს.  საგარეჯოს რაიონის სოფელ რუსიანში დაკრძალვის ცერემონიალს საქართველოს პრეზიდენტი,  შინაგან საქმეთა მინისტრი ბაჩო ახალაია და სამინისტროს მაღალჩინოსნები დაესწრნენ. 

მიხეილ სააკაშვილმა გარდაცვლილის ოჯახს პირადად მიუსამძიმრა და მის ახლობლებს თანადგომა გამოუცხადა. 
სოლომონ წიკლაური გარდაცვალების შემდეგ ვახტანგ გორგასლის პირველი ხარისხის ორდენით დაჯილდოვდა და ჯილდო ოჯახს გადაეცა.

საქართველო-რუსეთის საზღვართან ანტიტერორისტული ოპერაციის დროს სამი ქართველი სპეცრაზმელი დაიღუპა, ხუთი კი დაიჭრა. დაღუპულთა შორის არიან შს სამინისტროს თანამშრომლები სოლომონ წიკლაური და არჩილ ჩოხელი. ასევე გარდაცვლილია თავდაცვის სამინისტროს სამხედრო ექიმი ვლადიმერ ხვედელიძე. 

რაც შეეხება დივერსანტთა ჯგუფს, ლიკვიდირებულია შეიარაღებული დაჯგუფების 11 წევრი. 

internet.ge