მარნეულში დღეს, ახალი იუსტიციის სახლი იხსნება. საქართველოს მასშტაბით ეს რიგით მე-8 იუსტიციის სახლია, სადაც 70-მდე ადგილობრივია დასაქმებული.

იუსტიციის სამინისტროს უმნიშვნელოვანესი  სტრატეგიული მიზანია მომხმარებლებისთვის ეფექტური და  ხელმისაწვდომი მომსახურების უზრუნველყოფა. სწორედ, ამ სტრატეგიული მიზნის მისაღწევად შემუშავდა იუსტიციის სახლის კონცეფცია, რომელიც მომხმარებლის სერვისთან და ინფორმაციასთან წვდომის გამარტივების თვალსაზრისით, რამდენიმე უწყების საქმიანობას ერთი შენობის ფარგლებში, ერთ სივრცეში აერთიანებს.

იუსტიციის სახლში მისულ მომხმარებელს შესასვლელთან სერვისის კონსულტანტი  ეგებება, რომელიც აკვალიანებს მისთვის საინტერესო საკითხის შესახებ და საჭიროებისამებრ ამისამართებს შესაბამის ოპერატორთან. აქ მომსახურების დარბაზი დაყოფილია 3 სივრცედ: თვითმომსახურების სივრცე, სწრაფი მომსახურების  სივრცე და ხანგრძლივი მომსახურების სივრცე.

მომსახურების სივრცის მსგავსი დაყოფა მინიმუმამდე ამცირებს  ხანგრძლივი  და ქაოტური რიგის წარმოქმნის საშიშროებას.  სერვისის მიღების მსურველთა თანმიმდევრობას  კი სპეციალურად ინტეგრირებული რიგის მართვის  სისტემა აწესრიგებს. 

აქვე გათვალისწინებულია საბავშვო კუთხე,  რაც საშუალებას აძლევს მშობელს მშვიდად მიიღოს სასურველი სერვისი, სანამ მისი პატარა ერთობა.

„მაღალკვალიფიციური,  კომპეტენტური და კეთილგანწყობილი პერსონალი - იუსტიციის სახლის სავიზიტო ბარათია. ეფექტური კომუნიკაციის,  ხარისხიანი მომსახურების  საკითხებში არაერთგზის დატრენინგებული  თანამშრომლები  მომხმარებლთა  თავაზიან, სწრაფ და კვალიფიციურ მომსახურებას უზრუნველყოფენ. ამგვარად, თავისუფლად შეიძლება ითქვას, რომ იუსტიციის სახლი მოქალაქეების უფლებებისა და თავისუფლებების რეალიზაციის ის ადგილია,  სადაც არალიმიტირებული, უწყვეტი ორმხრივი კომუნიკაციის  პირობებში ხდება საჭირო სერვისებით უზრუნველყოფა.იუსტიციის სამინისტროს მიერ არაერთ წარმატებით განხორციელებულ მნიშვნელოვან რეფორმასა და  ნოვატორულ პროექტს შორის, იუსტიციის სახლს  განსაკუთრებული ადგილი უჭირავს“,- აცხადებენ იუსტიციის სახლში.

 internet.ge