სემ ბეისილი, რეჟისორი ისლამის შესახებ სკანდალური ფილმისა, რომლის ფრაგმენტების ინტერნეტში გავრცელებამაც რამდენიმე ქვეყანაში აშშ-ის საელჩოზე თავდასხმები და მსხვერპლი გამოიწვია, იმალება. ის შიშობს, რომ შესაძლოა მოკლან - იუწყებიან დასავლური სააგენტოები თავად რეჟისორზე დაყრდნობით.

ბეისილი ამბობს, რომ არის ისრაელის მოქალაქე, ფილმი კი ეგვიპტელი ქრისტიანების მხარდაჭერით შექმნა. მან ასევე წუხილი გამოთქვა ამერიკელი დიპლომატების დაღუპვის გამო ლიბიაში, როცა სწორედ მისი ფილმის გამო გამრისხანებული ისლამისტები აშშ-ის საკონსულოს შენობას დაესხნენ თავს.

როგორც რადიო თავისუფლება იუწყება, აშშ-ის შტაბების მეთაურთა გაერთიანებული კომიტეტის ხელმძღვანელმა გენერალმა მარტინ დემპსიმ გუშინ სკანდალურად ცნობილ პასტორთან ტერი ჯონსთან სატელეფონო საუბარში, მას მოსთხოვა, უარი ეთქვა აღნიშნული ფილმის მხარდაჭერისგან. სხვადასხვა ინფორმაციით, სწორედ ფილმისადმი ჯონსის მხარდაჭერამ გააღიზიანა ისლამისტები, რადგან ჯონსი ის ადამიანია, რომელმაც ცოტა ხნის წინ საჯაროდ დაწვა ყურანი, რითაც ახლო აღმოსავლეთის ქვეყნების რისხვა გამოიწვია.

ლიბიაში განვითარებული მოვლენები ბარაკ ობამას კრიტიკის საფუძველი გახდა მით რომნისთვის. მან განაცხადა, რომ ობამას ძალიან რბილი პოზიცია ჰქონდა.

დემოკრატებმა კი თავის მხრივ კრიტიკითვე უპასუხეს რომნის და განაცხადეს, რომ მისი თავდასხმები ობამაზე ნაციონალური გლოვის დროს - უადგილოა.

ლიბიაში აშშ-ის ელჩის - კრისტოფერ სტივენსის დაღუპვის გამო შეერთებულ შტატებში გლოვაა გამოცხადებული.

internet.ge