2012 წლის საპარლამენტო არჩევნების დროს, საქართველოში „საზოგადოებრივი მაუწყებლის“ მიერ დაგეგმილი ეგზიტპოლების შესახებ ისაუბრებენ დღეს დაგეგმილ ერთობლივ ბრიფინგზე „საზოგადოებრივი მაუწყებლის“ გენერალური დირექტორი გიორგი ჭანტურია და  კვლევითი კომპანია GfK-ს წარმომადგენელი ნიკ მუნი.

ეგზიტპოლებს საერთაშორისო კვლევების ევროპული ლიდერი კომპანია GfK (www.gfk.com) საქართველოში უკვე მეორედ ახორციელებს.

კონტრაქტის ღირებულება 230 000 აშშ დოლარს შეადგენს. კონტრაქტი ითვალისწინებს არჩევნების დღეს ეგზიტპოლისა და სექტემბერში ორი სოციოლოგიური კვლევის ჩატარებას. „საზოგადოებრივი მაუწყებელი“ საარჩევნო ეგზიტპოლს უკვე მესამედ უკვეთავს (აქედან მეორედ GfK-ის). ამ მიმართულებით მაუწყებელი ხელმძღვანელობს საზოგადოების ინტერესით.

ეგზიტპოლი საერთაშორისოდ აპრობირებული მეთოდია, რომელსაც იყენებენ წამყვან დასავლურ ქვეყნებში, რათა დააკმაყოფილონ მოსახლეობის ინტერესი არჩევნების შედეგების მიმართ, სანამ გამოცხადდება ოფიციალური შედეგები. ეგზიტპოლი ავსებს ინფორმაციულ ვაკუუმს უბნების დახურვიდან ოფიციალურ წინასწარ შედეგებამდე. საქართველოს შემთხვევაში, ეს პერიოდი 24-30 საათს შეადგენს.

ეგზიტპოლების შედეგები ქვეყნდება მაუწყებლების მეშვეობით. ამიტომ მთელ მსოფლიოში, სწორედ მაუწყებლები არიან ამ კვლევის დამკვეთები. გამომდინარე იქიდან, რომ ეს არ არის კომერციულად მომგებიანი პროექტი, კერძო არხები ხშირ შემთხვევაში ერიდებიან ამ ძვირად ღირებული კვლევის ჩატარებას. გამომდინარე საზოგადოებრივი ინტერესიდან, სწორედ საზოგადოებრივი მაუწყებლები იღებენ დამკვეთის როლს მსოფლიოს მასშტაბით (მაგ. BBC, ავსტრიის საზოგადოებრივი მაუწყებელი და სხვა).

საგულისხმოა, რომ GFK ერთ-ერთი წამყვანი ბრენდია კვლევით ბაზარზე. აქვს დიდი გამოცდილება პოლიტიკური კვლევების, მათ შორის ეგზიტპოლების მსოფლიო მასშტაბით ჩატარების. ამავე დროს, ნაყოფიერად თანამშრომლობს სხვადასხვა საზოგადოებრივ თუ კომერციულ მაუწყებლებთან. „საზოგადოებრივი მაუწყებელი“ და კომპანია GfK თანამშრომლობდნენ 2010 წლის ადგილობრივი არჩევნების დროს და ამ თანამშრომლობის შედეგი მაღალპროფესიულად ჩატარებული ეგზიტპოლი და დროულად გამოცხადებული ქ. თბილისის მერისა და საკრებულოს არჩევნების შედეგები იყო, რომელთა მაქსიმალური ცდომილება ოფიციალურ შედეგებთან 2%–ს შეადგენდა.

გამოკითხვა ჩატარდება საქართველოს 220 საარჩევნო უბანზე. გამოიკითხება 25 000 რესპონდენტი, რაც იძლევა 3%-მდე მაქსიმალურ ცდომილებას.

ამომრჩევლის დასწრებასთან დაკავშირებული მონაცემები გადაიცემა არჩევნების დღეს 12:00, 17:00 და 20:00 საათზე. წინასწარი შედეგები მოსახლეობას 20:00 საათზე, ხოლო საბოლოო შედეგები მაყურებელს 21:00 საათზე ეცნობება.

Internet.ge