6 წლის კოლუმბიელ დიდიე მონტალვოს რამდენიმე ოპერაციის გადატანა მოუხდა, რათა სამუდამოდ დაეღწია თავი სიმსივნური გამონაზარდისგან, რომლის გამოც ბავშვს „ბიჭუნა-კუც“ კი შეარქვეს.

დიდიეს, სხეულზე, ბავშვობიდან დიდი ხალები ჰქონდა, მაგრამ დედას განსაკუთრებული ყურადღება ამისთვის არ მიუქცევია. თუმცა აღმოჩნდა, რომ მოზარდს პროგრესირებადი დაავადება აწუხებდა. შედეგად, ბავშვს ზურგზე უზარმაზარი სიმსივნური წარმონაქმნი განუვითარდა და ფიზიკური ტკივილების გარდა იმითაც იტანჯებოდა, რომ გამონაზარდი რამდენიმე კილოგრამს იწონიდა.

ყველაზე საშინელება კი მაშინ მოხდა, როცა დაავადების გამო ოჯახი სოფლიდან გააძევეს, ბიჭუნას კი სკოლაში სიარული და მეგობრებთან თამაში აუკრძალეს.

ცრუმორწმუნე კოლუმბიელებმა ბავშვის დედა იმაში დაადანაშაულეს, რომ ფეხმძიმობის დროს მან მზის დაბნელებას უყურა.

დიდიეს, შეიძლება, დიდხანს ეცხოვრა ამ გამონაზარდით, რომ არა მასზე დაბეჭდილი სტატია ადგილობრივ გაზეთში, რის შემდეგაც ხალხმა ბავშვის დასახმარებლად და ოპერაციის დასაფინანსებლად ფულის შეგროვება დაიწყო.

ოპერაცია ქირურგმა ნილ ბალსტროუდმა ჩაატარა, რომელიც სპეციალურად ამ შემთხვევისთვის კოლუმბიაში ლონდონიდან ჩავიდა.

internet.ge