სამასზე მეტი სახელმწიფო და კერძო სერვისი ერთ სივრცეში დღეს უკვე თელაველებისთვისაც გაერთიანდა. კახეთის ისტორიულ ქალაქში იუსტიციის სახლი დღეს საქართველოს პრეზიდენტმა მიხეილ სააკაშვილმა გახსნა.
იუსტიციის სამინისტროს ინფორმაციით, საქართველოში რიგით მეცხრე იუსტიციის სახლი ერეკლეს მოედანზე განთავსდა. მისი ორიგინალური არქიტექტურა „არქიტექტურის ლაბორატორია 3"-ს ეკუთვნის. მოქალაქეების მიღებას სერვისცენტრი უკვე ორშაბათიდან შეძლებს.
თელავის რეაბილიტაციის პროექტის საზეიმო გახსნა მართლაც შთამბეჭდავი აღმოჩნდა. საზეიმო ღონისძიებები ქალაქში დილიდან დაიწყო. განახლებულმა ნადიკვარის პარკმა, ერეკლეს ძეგლის ტერიტორიამ, ჩოლოყაშვილის ისტორიულმა ქუჩამ უამრავ სტუმარს უმასპინძლა. საზეიმო განწყობა დამთვალიერებლებს მოძრაობის თეატრის და ცირკი „შაპიტოს" მასხიობებმაც შეუქმნეს. განახლებულ ჩოლოყაშვილზე ერთად სეირნობდნენ პატარები და მათი საყვარელი ზღაპრების გმირები. ერეკლეს მოედანზე გიგანტური საწნახელში მსურველებმა ღვინის დაწურვაში მონაწილეობა და სუვენირების შეძენა შეძლეს, ღვინისა და ჩურჩხელის დაგემოვნება კი სტუმრებს მერკადოს ბაზარში მიეცათ.
იუსტიციის სახლის გახსნის შემდეგ, ზეიმი თელავში ცნობილი ჯგუფის „ჩიკო ენდ ჯიბსის" ახალგაზრდა ბენდის კონცერტით გაგრძელდა, ღონისძიების ბოლოს კი ულამაზესი ფოიერვერკი მოეწყო. თელავში ღონისძიებებს ცნობილი ჯგუფის "ჯიბსი კინგის" ახალგაზრდა წევრების კონცერტი დაასრულებს.
სარეაბილიტაციო სამუშაოების კვალი მთელს თელავს ეტყობა. აღდგენილია ნადიკვარის პარკი, ერეკლეს ძეგლის მიმდებარე ტერიტორია, ისტორიული იერი დაუბრუნდა ჩოლოყაშვილის ქუჩას, ფერი იცვალა ერეკლეს ძეგლის მიმდებარე ტერიტორიამ. დასრულდა ყვარლის რეაბილიტაციაც, განახლებული ქალაქი საზეიმოდ ხვალ გაიხსნება, ისტორიული ციხის ტერიტორიაზე გამართული თეატრალიზებული ღონისძიების შემდეგ, სტუმრებს იუსტიციის სასწავლო ცენტრის თანამედროვე ოფისის დათვალიერების საშუალებაც ექნებათ.
