თბილისის მერმა გიგი უგულავამ გლდანის საპყრობილეში მომხდარ ფაქტთან დაკავშირებით განცხადება გააკეთა, რომელსაც „ინტერნეტ.ჯი“ უცვლელად გთავაზობთ:

“ეს ყველაფერი იყო შემზარავი. ცალსახად დასაგმობია და მიუთითებს იმას, რომ ბევრი, მნიშვნელოვანი, ფუნდამენტური რეფორმებისა, მათ შორის მტკივნეული რეფორმებისა, რომლებიც ჩვენ ამ წლებში გავატარეთ, სადღაც რაღაცა გამოგვრჩა, სადღაც რაღაცას ყურადღება ბოლომდე ვერ მივაქციეთ.

სახეზეა სისტემური პრობლემა და მას სწრაფი რეაგირება სჭირდება. მე, როგორც „ნაციონალური მოძრაობის“ წევრი, იმ გუდის წევრი, რომელიც პასუხისმგებელობას იღებს ქვეყანაში მიმდინარე პროცესებზე, პირველ რიგში მინდა ბოდიში მოვუხადო ჩემი პირადი სახელით, ისევე როგორც ჩემი კოლეგების სახელით იმ ადამიანებს, რომელთაც ასეთი სადისტური ზიანი მიაყენეს და ამავდროულად პირობა დავდო, რომ ჩვენ უნდა გავაკეთოთ ყველაფერი, რომ ჩვენს ციხეებში მსგავსი რამ არასდროს განმეორდეს. იმიტომ რომ, ყველა მიღწევისა და წარმატების მიუხედავად, მთავარი ღირებულება არის ადამიანი, ჩვენი მოქალაქე.

განსაკუთრებული ყურადღება სჭრიდება იმ ადამიანს, მიუხედავად იმისა რა აქვს მას ჩადენილი, ვინც იმყოფება ციხეში, იმიტომ, რომ ყველა ქვეყანაში, ყველა სიტუაციაში, ცდუნება სისტემის, რომ დათრგუნოს ასეთი ადამიანები ყოველთვის ყველაზე მაღალია. ამიტომ, გაათკეცებული ყურადღებაა საჭირო ამ პრობლემების მიმართ. ჩვენ ერთად ვიბრძოლეთ, ბევრ წარმატებას მივაღწიეთ, მაგრამ ადამიანის უფლებების დაცვა არის განუხრელი, პირველადი ამოცანა და თუ ჩვენ სადმე გვექნება სუსტი რგოლი, მაშინ შეუძლებელია წარმატებაზე საუბარი.

ეხლა წინასაარჩევნო პერიოდია და მე მინდა განსაკუთრებით სამართალდამცავებს ვთხოვო, რომ ყოველგვარი პოლიტიკური შეხედულების გარეშე, ობიექტურად იქნას ეს ყველაფერი გამოძიებული, რომ საზოგადოებას არ დარჩეს არავითარი შეკითხვა. ჩვენი ამოცანა არ უნდა იყოს დღეს პოლიტიკური, არამედ, ორიენტირებული უნდა იყოს თითოეული დაზარალებული ადამიანის სახით ჩვენ უნდა ვუთხრათ საზოგადოების ყველა წევრს, რომ მსგავსი რამ დაუშვებელია თანამედროვე საქართველოში.“

internet.ge