ადამიანის უფლებათა საკითხებში გაეროს უმაღლესი კომისარი ნავი პილეი გმობს საქართველოს ციხეებში, მათ შორის, არასრულწლოვანთა დაწესებულებებში, წამებისა და პატიმართა მიმართ სხვა სასტიკი ფორმებით მოპყრობის ფაქტებს.

მან აღნიშნა, რომ ზოგიერთი ეს ფაქტი გავრცელებულ "შოკისმომგვრელ ვიდეორგოლებშია” ასახული.

გაეროს მთავარმა უფლებადამცველმა მოუწოდა საქართველოს ხელისუფლებას, სასწრაფოდ გამოიძიოს წამების შემთხვევები და სისხლის სამართლის საქმეები აღძრას დამნაშავეებზე.

“ჩვენ მოვუწოდებთ საქართველოს მთავრობას, ოპერატიულად, მიუკერძოებლად და ეფექტურად გამოიძიოს ინფორმაცია ადამიანის უფლებათა დარღვევების შესახებ და არა მარტო ის შემთხვევები, რომლებიც ვიდეოებშია დაფიქსირებული,” – განაცხადა ჟენევაში გამართულ ბრიფინგზე უმაღლესი კომისრის პრეს-მდივანმა ღუპერტ კოლვილმა.

მან დასძინა, რომ ამ დანაშაულის მსხვერპლმა ადამიანებმა უნდა მიიღონ შესაბამისი სამედიცინო და ფსიქოლოგიური დახმარება, ასევე მატერიალური კომპენსაცია.

Internet.ge