შსს საინფორმაციო-ანალიტიკური დეპარტამენტის საინფორმაციო ცენტრის მიერ გამოქვეყნებული კვლევების მიხედვით, ყველაზე გავრცელებულ ადმინისტრაციულ სამართალდარღვევებს: სიჩქარის გადაჭარბება, უსაფრთხოების ღვედის გამოუყენებლობა, ან მობილურით სარგებლობა და სიმთვრალე წარმოადგენს.

კვლევების მიხედვით, გამოვლენილ სამართალდარღვევათა პროცენტული თანაფარდობა გენდერული კუთხით  91% / 9%-ზე მამაკაცების "სასარგებლოდაა" .

დამრღვევთა შორის ასაკობრივი გრადაციით, როგორც ქალებში, ასევე მამაკაცებში "ლიდერობს“ 31-40 წლის პირთა სეგმენტი. ქალებთან მიმართებაში კი,  ალკოჰოლური სიმთვრალით გამოწვეულ სამართალდარღვევების კუთხით  50 წელს გადაცილებული ქალბატონები "ლიდერობენ".

მონაცემების მიხედვით, დღესდღეობით მამაკაცი მძღოლების თითქმის 70%-ს 10 წელი და მეტი სტაჟი გააჩნია, მაშინ როცა ქალი მძღოლების 1/3-ს მხოლოდ 5 წელი და უფრო ნაკლები  გამოცდილება. წარდგენილი განაცხადების რაოდენობებთან მიმართებაში - ყველაზე დიდი მოთხოვნაა მართვის მოწმობის გამოცვლაზე, რაც შეადგენს 55%-ს. ხოლო,  პირველადი მართვის მოწმობის წილი 25% -ია.

„მართვის მოწმობის პრაქტიკული გამოცდის წარმატებით ჩაბარებასთან დაკავშირებით ლიდერობენ მამაკაცი მძღოლები. გამოცდის პრაქტიკულ ნაწილს მათი უმრავლესობა 1-2 ცდიდან აბარებს, მათ შორის პირველი ცდიდან 32%. მაშინ, როცა ქალების  45%-ს, ანუ თითქმის ნახევარს,  4 და მეტი ცდა სჭირდება წარმატებისთვის. ქალების  მხოლოდ 18% აბარებს პრაქტიკულ გამოცდას პირველივე ცდიდან.  აქვე აღსანიშნავია ისეთი შემთხვევებიც, როცა წარმატებისთვის 30-31 ცდაც კი გახდა საჭირო. რაც შეეხება თეორიულ გამოცდას, მამაკაცების, ისევე როგორც ქალების უმრავლესობა პირველივე ცდიდან აბარებს. ქალები ოდნავ უკეთესი მაჩვენებლით გამოირჩევიან (67%), ვიდრე მამაკაცები (60%)“,- ნათქვამია კვლევებში.

რაც შეეხება პირველადი მართვის მოწმობების გაცემის განაწილებას  რეგიონების მიხედვით, მთელი რაოდენობის 1/3 მოდის თბილისის მოსახლეობაზე, მეორე ადგილზეა იმერეთის რეგიონი 16%-ით. ყველაზე ნაკლები აქტივობით რაჭა-ლეჩხუმის მაცხოვრებლები გამოირჩევიან, მათი წილი მხოლოდ 0.6%-ს შეადგენს.

ადმინისტრაციულ სამართალდარღვევათა რაოდენობის მხრივ, როგორც აბსოლუტური, ასევე ხვედრითი წილის მიხედვით "ლიდერობს" თბილისი/მცხეთა-მთიანეთის რეგიონი. ამ მხრივ ყველაზე უკეთესი მდგომარეობაა კახეთისა და სამცხე-ჯავახეთის რეგიონებში.

Internet.ge