ხე-ტყის მართვის სისტემაში ცვლილებები განხორციელდა, რომლის თანახმად, გაუქმდა ხე-ტყის წარმოშობის დოკუმენტი, ასევე საშეშე ხე-ტყის 1 მეტრამდე კოტრებად დაჭრის ვალდებულება, სამასალე მორის მარკირება, სახერხი საამქროს რეგისტრაცია და შესაბამისი ელექტრონული ანგარიშგების წარმოება,  ხე-ტყის დამზადების ბილეთის მოქმედების ვადა 2 თვიდან 1 წლამდე გაიზარდა. ამასთან,  შესაძლებელია სოციალური ჭრის შედეგად მოპოვებული ხე-ტყის კომერციული მიზნით გამოყენება.

რაც შეეხება ლიცენზიანტებს, ახალი ცვლილებებით გაუქმდა- ხე-ტყის წარმოშობის დოკუმენტი და სპეციალური ფირნიშით მარკირება, II ხარისხის (საშეშე) ხე-ტყის 1 მეტრამდე კოტრებად დაჭრის ვალდებულება,  ხოლო ათვისებული რესურსის შესახებ ელექტრონული ანგარიში სსიპ „ბუნებრივი რესურსების სააგენტოს“ წარედგინება და ასევე, მოიხსნა ტყეკაფების გამოყოფის შეზღუდვა.

დაგეგმილია 1 კუბ. მეტრი სამასალე და საშეშე ხე-ტყის მოსაკრებლის 2 ლარამდე შემცირება. ახალი მოსაკრებელი ძალაში ახალი პარლამენტის არჩევის შემდეგ ამოქმედდება, როდესაც შესაბამისი საკანონმდებლო ცვლილებები განხორციელდება. მოქმედი წესებით, კომერციული ჭრისათვის მოსაკრებლის ოდენობა 1 კუბ. მეტრ სამასალე ხე-ტყეზე 47-22 ლარს შეადგენს, ხოლო საშეშე მერქანზე 19-9 ლარს.

ცვლილებები ენერგეტიკისა და ბუნებრივი რესურსების სამინისტროს სსიპ „ბუნებრივი რესურსების სააგენტოს“ თანამშრომლებმა დღეს ხაშურის მოსახლეობას გააცნეს. შეხვედრას კერძო ლიცენზიანტები და მეტყევეებიც ესწრებოდნენ.

Internet.ge