საქართველოს პრეზიდენტმა, მიხეილ სააკაშვილმა დღეს, გორში იუსტიციის სახლი გახსნა.

იუსტიციის სახლში 300-ზე მეტი გამარტივებული სერვისის მიღებას მოქალაქეები  ერთ სივრცეში, უმოკლეს დროში შეძლებენ.

იუსტიციის სახლის პროექტი ქართველ არქიტექტორს, კომპანია „არქიტექტორული ჯგუფი და პარტნიორების" არქიტექტორს, ირაკლი შარაშიძეს ეკუთვნის, სამშენებლო სამუშაოები „მენო ინტერნეიშენალმა“ აწარმოა. გორის იუსტიციის სახლი 7 თვეში აშენდა, ხოლო მშენებლობაზე 300-მდე ადგილობრივი იყო დასაქმებული.

იუსტიციის სახლი 3000 კვ. მ.-ია და მასში სახელმწიფო სერვისების განვითარების, საჯარო რეესტრის ეროვნული სააგენტოს, ეროვნული არქივის, აღსრულების ეროვნული ბიუროს, ნოტარიუსთა პალატის  სერვისების გარდა, რეგიონული პროკურატურის ოფისებიც განთავსდა. აქვე იმუშავებს  იუსტიციის სამინისტროს ახალგაზრდული პროექტი - ლიდერთა სახლი. მოხალისეობრივ პროგრამაში ჩართული ახალგაზრდები გორელებისათვის სხვადასხვა პროგრამებს განახორციელებენ, რომლებიც ჯანსაღი ცხოვრების წესის პოპულარიზაციისაკენ იქნება მიმართული; მოაწყობენ სპორტულ და ინტელექტუალურ შეჯიბრებს. იუსტიციის სახლში მოქალაქეთათვის სერვისების კომფორტულად მიწოდებაზე 30 თანამშრომელი იზრუნებს.

საქართველოში პირველი იუსტიციის სახლი 2011 წლის 26 მაისს, ბათუმში გაიხსნა და ის თანამედროვე საქართველოს რეფორმებისა და აღმშენებლობის სიმბოლოდ იქცა. იუსტიციის სახლის გამარტივებული სერვისებით სარგებლობა ბათუმში, რუსთავში, მესტიაში, გურჯაანში, ქუთაისში, ოზურგეთში, ახალციხეში, მარნეულში, თელავში, სიღნაღში, თბილისში და, ახლა უკვე გორშიცაა შესაძლებელი. 

internet.ge