სოფლის მეურნეობის მინისტრი ზაზა გოროზია, ლტოლვილთა და განსახლების მინისტრი კობა სუბელიანი და ქვემო ქართლის გუბერნატორი დავით კირკიტაძე თეთრიწყაროს რაიონის სოფელ წინწყაროში ჩასახლებულ დევნილ მოსახლეობას შეხვდნენ და სააღდგომო საჩუქრები გადასცეს.

დღესვე, ზაზა გოროზია საგაზაფხულო სასოფლო-სამეურნეო სამუშაოების მიმდინარეობას ადგილზე გაეცნო.

"წელს, სოფელ წინწყაროს მოსახლეობამ 30 ლარიანი სასოფლო–სამეურნეო ვაუჩერები მიიღო, რითაც დამატებით მიწების დამუშავების საშუალება მიეცათ. ეს ხელს შეუწყობს მოსავლის გაზრდას და მეტი შემოსავლის მიღებას“, – განაცხადა ზაზა გოროზიამ.

რაიონში ხვნა-თესვის პროცესი აქტიურ ფაზაშია და მიწის დამუშავება სოფლის მეურნეობის განვითარებისა და ფერმერთა დახმარების პროგრამით შემოყვანილი ტრაქტორებით მიმდინარეობს. ტექნიკის შეძენა და რეგიონებში გადანაწილება გაგრძელდება და 4 ეტაპად განხორციელდება. საერთო ჯამში წლის ბოლოს ქვეყანაში 600 ერთეული ახალი სხვადასხვა დანიშნულების და სიმძლავრის ტრაქტორი და 1200 მისაბმელი შემოვა.

Internet.ge