ბოლო კვირაში დევნილთა მიერ შენობებში უკანონოდ შეჭრისა და ფართების თვითნებურად დაკავების ფაქტებთან დაკავშირებით საქართველოს ლტოლვილთა და განსახლების სამინისტრო განცხადებას ავრცელებს, სადაც დევნილებს უკანონო ქმედებებისაგან თავის შეკავებისკენ მოუწოდებს.

გავრცელებულ განცხადებას  „ინტერნეტ.ჯი“ უცვლელად გთავაზობთ:

„საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს განცხადებით ბოლო დღეებში ადგილი აქვს დევნილების მიერ შენობებში უკანონოდ შეჭრისა და ფართების თვითნებურად დაკავების ფაქტებს.

მსგავსი ფაქტი დაფიქსირდა ასევე მუხიანში, პედაგოგიურ კოლეჯში, სადაც სამინისტროსა და შენობაში თვითნებურად შეჭრილ დევნილთა შორის მოლაპარაკებების შედეგად დევნილებმა ნებაყოფლობით გამოათავისუფლეს შენობა და სამინისტრომ შეძლო დაესრულებინა აღნიშნულ ობიექტში დევნილთა მიმართ სახელმწიფო სტრატეგიის მიხედვით დევნილთა განსახლება.

სამინისტრო მიესალმება აღნიშნულ ქმედებას და მოუწოდებს სხვა დევნილებს, რომლებიც ამ დრომდე კიდევ რჩებიან უკანონოდ სხვადასხვა შენობებში შეჭრილები, თავი შეიკავონ უკანონო ქმედებებისაგან და არ გასცდნენ სამართლებრივ ჩარჩოებს.

დევნილთა განსახლება გრძელდება სახელმწიფო სტრატეგიის სამოქმედო გეგმის შესაბამისად,“- ნათქვამია განცხადებაში.

Internet.ge