"ახალი სეზონიდან ჩვენი გადაცემის გადარჩენის და იმედზე დარჩენის საშუალება არსებობს" - წერს "ნანუკას შოუს" ავტორი ნანუკა ჟორჟოლიანი ფეისბუქის საკუთარ გვერდზე.

"ჩვენგან ძალიან უხერხულია ამაზე საუბარი, თუმცა მოკლედ შეგახსენებთ რა გააკეთა ამ გადაცემამ სამი წლის განმავლობაში. ჩვენი ოქროს ფონდი საზოგადოებისთვის ძალიან საყვარელ ადამიანებს ინახავს (სამწუხაროდ რამდენიმე მათგანი აღარ არის) ბევრ საქველმოქმედო ღონისძიებას და ადამიანებს, რომლებიც ჩვენ გაგაცანით. ბევრ ცრემლს და ღიმილს.

არსებობენ ბიზნესმენები, ბანკირები, კერძო კომპანიის მფლობელები, რომლებიც დაადასტურებენ რომ ეს გადაცემა ბიზნესის თვალსაზრისით და ადამიანურად (მიღებულ რეზონანსებს და გამოხმაურებებს ვგულისხმობ) ძალიან მომგებიანი იყო. ამიტომ მივიღეთ გადაწყვეტილება გადაცემა გავიტანოთ "თი-ბი-სი TV"-ში, თუ მხოლოდ ჩვენი გადაცემების არქივით იხელმძღვანელებთ, ანუ იმით, თუ რა გავაკეთეთ ქართულ ტელე-სივრცეში ამ წლის განმავლობაში ჩვენ მზად ვართ თანამშრომლობის გეგმა წარვუდგინოთ იმ ადამიანებს (ბიზნესმენებს, ბანკირებს, კერძო კომპანიის მფლობელებს), რომლებიც ფიქრობენ "ნანუკას შოუ" ყოველ სამშაბათს 22:00 საათზე ისევ თქვენთან ერთად უნდა იყოს, - წერს ნანუკა ჟორჟოლიანი და მადლობას უხდის ყველა ადამიანს, რომელიც მათ გვერდით იყო და არის.

შეგახსენებთ, რომ ტელეკომპანია "იმედი" მაუწყებლობის ფორმატს ცვლის და გასართობ შოუებს ხურავს. ეს შეზღუდვა რამდენიმე გადაცემის შემდეგ "ნანუკას შოუსაც" შეეხება.

internet.ge