სასჯელაღსრულების მოქმედი მინისტრის გიორგი ტუღუშის განცხადებით,  სასჯელაღსრულების სისტემაში სამოქალაქო ჯანდაცვა ყველა პატიმრისთვის ხელმისაწვდომი უნდა გახდეს.

როგორც ტუღუშმა „რუსთავი 2“-ის ეთერში განაცხადა, მნიშვნელოვანია, რომ სისტემაში მომუშავე ყველა ღირსეულმა ადამიანმა თანამდებობა შეინარჩუნოს.

„სისტემაში სამართლიანი მიდგომა უნდა დაინერგოს. რომელიც პენიტენციალურ სისტემას პრესტიჟულს გახდის და არა ისეთს,  სადაც მივა მხოლოდ ისეთი ადამიანი, რომელმაც სხვა სამსახური ვერ ნახა. ამ კუთხით ჩვენ უკვე გადავდგით ნაბიჯები და სახელფასო ბადე გავაორმაგეთ. იგივე იქნება გასაკეთებელი სამედიცინო პერსონალისთვის“,- განაცხადა მოქმედმა მინისტრმა.

მისი თქმით, სამინისტროს  არაერთი უცხოელი ექსპერტის დახმარება დასჭირდება.

„საჭიროა კონტროლის შიდა მექანიზმი შეიქმნას. სისტემა გარე მონიტორინგზე არ უნდა იყოს დამოკიდებული “,- დასძინა მინისტრმა.

ტუღუშის თქმით, მისი მინისტრობის განმავლობაში ციხე საზოგადოების წარმომადგენლებისთვის გაიხსნება.

internet.ge