კოალიცია "მედიის ადვოკატირებისთვის" ახალი მოწვევის პარლამენტს რამდენიმე წინადადებით მიმართავს.

კოალიციის წევრები, საზოგადოებრივი მაუწყებლის დამოუკიდებელ მაუწყებლად ჩამოყალიბებასა და განვითარებას ითხოვენ.

„საზოგადოებრივი მაუწყებლის საქმიანობის შესწავლის მიზნით, საქართველოს პარლამენტის მოთხოვნით სახელმწიფო აუდიტის სამსახურმა განახორციელოს არაგეგმიური აუდიტი და გამოვლენილი შედეგები წარმოუდგინოს საქართველოს პარლამენტსა და საზოგადოებას. აღნიშნული ღონისძიების განხორციელების აუცილებლობა ცხადყო უკანასკნელ დღეებში განვითარებულმა მოვლენებმა: ა) საზოგადოებრივ მაუწყებელში დაგროვილი საგადასახადო ვალების ჩამოწერამ და ბ) ტელეკომპანია „პიკ“-ის მმართველ კომპანია „ალანიასთან“ წარმოქმნილმა კონფლიქტმა. მეორე მხრივ, სახელმწიფო აუდიტის შემოწმების დაწყებამდე, საზოგადოებრივმა მაუწყებელმა გაასაჯაროვოს ფინანსური ხარჯები და ტელეკომპანია „პიკ“-ის მმართველ კომპანიასთან - „ალანიასთან“ გაფორმებული ხელშეკრულება და სხვა მნიშვნელოვანი დოკუმენტები,“- აცხადებენ კოალიციის წევრები.

მეორე წინადადება, რომლითაც ისინი პარლამენტს მიმართავენ არის: MUST CARRY და MUST OFFER-ის რეგულირება მაუწყებლობის შესახებ კანონით. ასევე სასამართლოში ფოტო და ვიდეოგადაღების ჩაწერის უფლების აღდგენას აყენებენ.

კოალიცია ასევე ითხოვს,  მოხდეს აჭარის ტელევიზიის სამართლებრივი სტატუსის განსაზღვრა და ციფრულ მაუწყებლობაზე გადასვლა მედიაპლურალიზმის უზრუნველყოფისა და აუდიტორიის ინტერესების დაცვის კონტექსტში.

როგორც დღეს გამართულ პრესკონფერენციაზე, ორგანიზაციის წევრებმა განაცხადეს, უნდა მოხდეს საჯარო პირებისა და საჯარო დაწესებულებების მხრიდან მედიასთან ურთიერთობის სტანდარტების შეცვლა და კომუნიკაციების ეროვნული კომისიის ფორმირების წესისა და ფუნქციების გადახედვა.

Internet.ge