„ქრისტიან–დემოკრატები“ დეკრეტული შვებულების ხანგრძლივობისა და ანაზღაურების გაზრდას ითხოვენ.

როგორც დღეს გამართულ პრესკონფერენციაზე ფრაქციის წევრმა, მაგდა ანიკაშვილმა განაცხადა,  საქართველოს კათოლიკოს–პატრიარქის სააღდგომო ეპისტოლეში საგანგებოდ აღინიშნა, რომ ხელისუფლების განსაკუთრებული ზრუნვის საგანი დედათა და  ბავშვთა ჯანმრთელობა უნდა იყოს.

მისი თქმით, შრომის კოდექსში ცვლილებები უნდა შევიდეს, რომლის მიხედვით, დეკრეტული შვებულება 126 დღიდან 180–მდე უნდა გაიზარდოს.

რაც შეეხება დეკრეტული შვებულების ანაზღაურებას, ანიკაშვილის განცხადებით, კოდექსის მოქმედი რედაქციით, ეს თანხა 600 ლარია და ის  1000 ლარამდე უნდა გაიზარდოს.  

„მისმა უწმინდესობამ დეკრეტული შვებულების გახანგრძლივების საკითხზე გაამახვილა ყურადღება. სწორედ, ამიტომ ხელისუფლებას მოვუწოდებთ, რომ ამ საკითხზე მსჯელობა დაუყოვნებლივ დაიწყოს. უკვე სამი წელია, რაც ცვლილებების პროექტი დარეგისტრირებული გვაქვს, რომელიც დეკრეტული შვებულების გარდა, შრომითი ურთიერთობების სხვა მიმართულებების დარეგულირებასაც მოიცავს. ინიციატივას მსვლელობა დღემდე არ მიეცა. პროცედურას საპარლამენტო უმრავლესობა სრულიად შეგნებულად აფერხებს. ამ კანონპროექტის განხილვას  წამყვანი – იურიდიულ საკითხთა და ჯანდაცვის კომიტეტები აჭიანურებენ. ყველას კარგად გვესმის, რომ ამ შემთხვევაში, პოლიტიკური ნება არის გადამწყვეტი და არა პროცედურული საკითხი“,  – აცხადებს დეპუტატი.   

ანიკაშვილმა პატრიარქის ეპისტოლეში აღნიშნული სხვა საკითხების შესახებაც ისაუბრა და განაცხადა, რომ იმ მედიკამენტების ჩამონათვალი უნდა გაიზარდოს, რომელთა ანაზღაურებას სადაზღვევო პოლისები ითვალისწინებს.    

„ქრისტიან–დემოკრატები“ შრომის კოდექსში ცვლილებების საკითხზე,  საპარლამენტო უმრავლესობასთან აქტიური კონსულტაციების დაწყებას გეგმავენ.

internet.ge