იუსტიციის სამინისტროს ინფორმაციით, იუსტიციის მინისტრი თეა წულუკიანი სამინისტროს თანამშრომლებს შეხვდა და სამომავლო გეგმების შესახებ ესაუბრა. შეხვედრას ესწრებოდნენ იუსტიციის მინისტრის პირველი მოადგილე დავით ჯანდიერი და მინისტრის მოადგილე ალექსანდრე ბარამიძე.
წულუკიანმა თანამშრომლებს ქვეყანაში მშვიდობიანი გზით ხელისუფლების შეცვლა მიულოცა და იმედი გამოთქვა, რომ ქვეყნისთვის ამ მეტად მნიშვნელოვან პერიოდში, იუსტიციის სამინისტროს თანამშრომლები შეძლებენ, გააერთიანონ ძალისხმევა და ერთგულად შეასრულონ მათზე დაკისრებული მოვალეობები.
იუსტიციის მინისტრის განცხადებით, უწყების პრიორიტეტი იქნება იუსტიციის სამინისტროს ჩამოყალიბება სამართლიანობის ერთ-ერთ გარანტად, იურიდიულ ავტორიტეტად, საჭირო რეფორმებისა და საკანონმდებლო ცვლილებების ინიციატორად. ამ მიზნის განხორციელებისათვის კი უწყება მჭიდროდ ითანამშრომლებს სამოქალაქო სექტორისა და საზოგადოების წარმომადგენლებთან. გაგრძელდება ყველა ის წარმატებული და მნიშვნელოვანი პროექტი, რომელსაც სამინისტრო დღემდე ახორციელებდა, გაძლიერდება ძალისხმევა იმ მიმართულებებით, სადაც უწყების ფუნქციონირებაში არსებობდა გარკვეული ტიპის ხარვეზები.
რაც შეეხება საკადრო ცვლილებებს, თეა წულუკიანის თქმით, ამ კუთხით, უწყებაში მასშტაბური ცვლილებები არ იგეგმება და თანამშრომელთა აბსოლუტური უმრავლესობა დაკავებულ პოსტებს შეინარჩუნებს.
შეხვედრის დასასრულს, იუსტიციის მინისტრმა მადლობა გადაუხადა სამინისტროს თანამშრომლებს გაწეული საქმიანობისათვის და პროფესიული წარმატებები უსურვა მომავალ საქმიანობაში.
internet.ge
