ვარშავაში, კატინის ტრაგედიის მსხევრპლი, იმ ათასობით პოლონელი ოფიცრის ხსოვნის აღსანიშნავი მარში გაიმართა, რომლებიც 1940 წელს, საბჭოთა კავშირის ხელმძღვანელობის ბრძანებით შინაგან საქმეთა სახალხო კომისარიატის თანამშრომლებმა კატინში, ხარკოვში, მედნომში, ტვერსა და ბიკოვნეში დახვრიტეს.

მარშის მონაწილეებმა, ასევე, პატივი მიაგეს 2010 წლის სმოლენსკის ტრაგედიის მსხვერპლთ, როცა პოლონეთის პრეზიდენტი და ქვეყნის პოლიტიკური, სამხედრო და კულტურული ელიტის დიდი ნაწილი ავიაკატასტროფის შედეგად დაიღუპა.

როგორც გაზეთი gazeta.pl იუწყება, მარშის მონაწილეები სპეციალურად, სამხედრო ფორმებში იყვნენ გამოწყობილნი. მარში სრული დუმილის ატმოსფეროში ჩატარდა.

„საუბარია პოლონეთის ელიტაზე, რომელიც „ენკავედემ“ საშინლად აწამა. ჩვენი აქციის მიზანია შევინარჩუნოთ ხსოვნა იმ მილიონნახევარი პოლონელისა, რომლებიც აღმოსავლეთში გაიყვანეს, სადაც ბევრი მათგანი შრომით ბანაკებში დაიხოცა“ - ამბობს „რადოსლავის დაჯგუფების“ წარმომადგენელი ტომაშ კარასინსკი.

მარში „აღმოსავლეთში ნაწამებთა და დაღუპულთა მემორიალთან“ ლოცვით დასრულდა.

შეგახსენებთ, 1939 წლის სექტემბერში, საბჭოთა კავშირის ტერიტორიაზე, დაახლოებით 250 ათასი პოლონელი ტყვე მოხვდა. 1940 წლის მაისში კი  „ენკავედემ“ 21 587 პოლონელი, მათ შორის, 14 587 ოფიცერი დახვრიტა.

internet.ge