ნორვეგიელი ტერორისტი ანდერს ბრეივიკი მხოლოდ იმას ნანობს, რომ შემთხვევითი გამვლელები დახოცა. მან ოსლოში მიმდინარე სასამართლო სხდომაზე ბოდიში მოუხადა იმ დაღუპულთა ნათესავებს, რომლებიც 2011 წლის 22 ივლისს ტერორისტის მიერ ოსლოს სამთავრობო კვარტალში ბომბის აფეთქებას შეეწირნენ. ამასთან, ბრეივიკმა უარი თქვა ბოდიში მოეხადა კუნძულ უტოიაზე ჩადენილი მკვლელობების გამო, რადგან ეს ტერაქტი, როგორც მან განაცხადა, „პოლიტიკური მოსაზრებების გამო“  მოაწყო. ბრეივიკმა უტოიას ახალგაზრდულ ბანაკს „იდეოლოგიური ბანაკი“ უწოდა.

ტერორისტმა ასევე განაცხადა, რომ კუნძულზე „ვერ“ მოკლა მოზარდი, რადგან არ შეეძლო ესროლა ბავშვისთვის. ბიჭი, რომელიც ბრეივიკმა „შეიბრალა“ 16 წლის იყო. ტერორისტი ამტკიცებს, რომ ის შიშისგან იყო პარალიზებული.

ტკივილი, რომელსაც მომხდარის შედეგად ბრეივიკის მსხვერპლთა ახლობლები განიცდიან, ტერორისტმა იმ განცდას შეადარა, რომელიც მან 22 ივლისის მოვლენების შემდეგ თავის ოჯახთან და მეგობრებთან დაშორების შემდეგ განიცადა.

მან კუნძულიდან გაქცევის გეგმაზეც ისაუბრა. ბრეივიკმა განაცხადა, რომ სურდა დამალულიყო ფორნებუს აეროპორტში მდგარი ჰიდროთვითმფრინავის საშუალებით. ის ტერაქტამდე ასეთი თვითმფრინავის მართვას ინტერნეტის საშუალებით სწავლობდა. ასევე აღნიშნა, რომ გაქცევას აპირებდა, ვთქვათ, რუსეთში. თუმცა მალე უარი თქვა ამ გეგმაზე, რადგან იფიქრა, რომ მისი ექსტრადირება ნორვეგიაში მაინც მოხდებოდა.

Internet.ge