მოსკოვის მოსახლეობა პანიკაშია. გუშინ, ქალაქი უჩვეულო მწვანე ღრუბლებმა  დაფარა. სოციალურ ქსელებზე გავრცელებული ინფორმაციის თანახმად, ღრუბელი მოსკოვისკენ სამხრეთიდან და სამხრეთ-აღმოსავლეთიდან დაიძრა, რასაც ადამიანები საკუთარი თვალით ხედავდნენ.

ერთ საათში კი, ქალაქის უმრავლეს რაიონებში ძლიერი ქარიშხალი ამოვარდა, რამაც მოსახლეობა კიდევ ერთი უჩვეულო მოვლენის მოწმე გახადა - ჰაერში მწვანე ფერის მტვერი ავარდა. ქარიშხალმა ხეები და სარეკლამო კონსტრუქციები წააქცია.

ქალაქის ხელმძღვანელობა შეშინებული ადამიანების დამშვიდებას შეეცადა.  მათ განაცხადეს, რომ მწვანე მტვერი არყის ხის ყვავილობამ წარმოქმნა და ღრუბლებიც მან შეაფერადა. თუმცაღა, მოსკოველები ამ ახსნა-განმარტებას არ სჯერდებიან: არყის ხეები პირველად არ ყვავის, მაგრამ ამას მსგავსი რამ არასოდეს გამოუწვევია.

მალევე, ინტერნეტში პარტია „იაბლოკოს“ ლიდერმა სერგეი მიტროხინმა გაავრცელა ინფორმაცია, რომ  „პოდოლსკში ქიმიურ ქარხანაში ავარია მოხდა. ჰაერში ყვითელი მტვერი ჩამოწვა. მოსახლეობას თავი სტკივა. ხელისუფლება მოუწოდებს მათ, დახურონ ფანჯრები და სახლებში დარჩნენ“. ორი საათის შემდეგ, როცა ოფიციალურმა სტრუქტურებმა ქიმიური აფეთქების ვერსია უარყვეს, მიტროხუნმა კვლავ დაწერა: „ქიმიურ ქარხანაში აფეთქების შესახებ ინფორმაცია „იაბლოკოს“ პოდოლსკელი და კლიმოვსკელი აქტივისტებისგან მივიღეთ. ამის შესახებ მათ ქარხანაში მომუშავე ნაცნობებმა შეატყობინეს. ჩავატაროთ დამოუკიდებელი გამოძიება“. Internet.ge