7 მაისიდან, საქართველოს მასშტაბით, 15 პროფესიულ კოლეჯში 2000-მდე სოციალურად დაუცველი სტუდენტი  ისწავლის.  აღნიშნული განცხადება განათლებისა და მეცნიერების მინისტრმა, დიმიტრი შაშკინმა ქუთაისში, პროფესიულ კოლეჯ "იბერიაში“ სტუმრობისას გააკეთა.

მისი თქმით, ამიერიდან, ყველა მსურველს აქვს შესაძლებლობა ისწავლოს, იშრომოს, გახდეს პროფესიონალი და დასაქმდეს.

განათლების სამინისტროს ინფორმაციით, 7 მაისიდან  კოლეჯში ახალი პროექტის ფარგლებში დაფინანსებული 360 სტუდენტი დაეუფლება დურგლის, ზეინკალ-სანტექნიკოსის, ელექტრიკოსოს, ძრავის შემკეთებლის, მკერავის, სასტუმრო საქმის მწარმოებლის, ინფორმაციული ტექნოლოგის, გრაფიკოსის, მზარეულის, მღებავის, მეფილე - მომპირკეთებელის, სარესტორნო საქმის მწარმოებელის, შემდუღებელის და სხა პროფესიებს.

ახალი პროქტის ფარგლებში, წლის განმავლობაში,  ვაუჩერული დაფინანსებით 7 000 ადამიანი ისწავლის. ვაუჩერით სრულად ფინანსდებიან სოციალურად დაუცველი სტუდენტები, ასევე, მიმდინარე წლის ცხრაკლასდამთავრებულები და მეთორმეტეკლასელები, რომელთაც სკოლის დამთავრების შემდეგ, გადაწყვიტეს პროფესიას დაეუფლონ.

შეგახსენებთ, რომ პრეზიდენტის ინიციატივით, წელს პირველად, პროფესიული განათლება ვაუჩერულ დაფინანსებაზე გადავიდა. სახელმწიფო ყველა მსურველს, ვინც  პროფესიულ კოლეჯში სწავლას გადაწყვეტს, ათასლარიანი ვაუჩერით აფინანსებს. ახალი პროექტის ფარგლებში, პირველ რიგში, სოცილაურად დაუცველი სტუდენტები დაფინანსდნენ.

Internet.ge