დღეს, ტექნიკური უნივერსიტეტის ადმინისტრაციული კორპუსის წინ უნივერსიტეტებს შორის ქუჩის კალათბურთის ტურნირი გაიმართება. შეჯიბრება ანტინიკოტინური პროგრამის „ჩააქრე და გამომყევი" ფარგლებში ტარდება.

აქციაში მონაწილეობას მიიღებენ თბილისის სახელმწიფო უნივერსიტეტის,  ტექნიკური უნივერსიტეტის, ილიას სახელმწიფო უნივერსიტეტისა და საქართველოს უნივერსიტეტის საკალათბურთო გუნდები.

ღონისძიების გახსნისას პროფესიონალი კალათბურთელები და მაყურებლები ერთმანეთს „ჩატენვებსა“ და სამქულიან სროლებში შეეჯიბრებიან. საუკეთესო შედეგის მქონე სამ მონაწილეს საჩუქრად აქციის „ჩააქრე და გამომყევი" ლოგოიანი მაისურები გადაეცემა.  ღონისძიების ბოლოს  საკალათბურთო მატჩები გაიმართება, რომლის გამარჯვებული გუნდიც სპეციალურ პრიზს მიიღებს.

ღონისძიების ორგანიზებით სსიპ „ბავშვთა და ახალგაზრდობის ეროვნული ცენტრი" მიზნად ისახავს ახალგაზრდებში ჯანსაღი ცხოვრების წესის პოპულარიზაციასა და ნიკოტინის მავნებლობის შესახებ მათ ინფორმირებას. აქცია 14:00 სთ-ზე დაიწყება.

Internet.ge