სპორტისა და ახალგაზრდობის საქმეთა სამინისტროს ორგანიზებით და კლუბის „რა? სად? როდის?" მხარდაჭერით, საქართველოს მასშტაბით ინტელექტუალური თამაშები გაიმართება. ინტელექტუალურ თამაშში მოსწავლეთა ჩემპიონატი ერთდროულად ჩატარდება ყველა მუნიციპალურ ცენტრში და დედაქალაქში.

სამინისტროს პრესსამსახურის ცნობით, ჩემპიონატს ოფიციალურად ლადო ვარძელაშვილი გახსნის, რომელიც თბილისის 51-ე საჯარო სკოლას ეწვევა.

ინტელექტუალურ თამაშში სხვადასხვა სკოლის (სულ 1196 სკოლა) სახელით 9568 მოსწავლე ასპარეზობს. მასში მე-6 - მე-12 კლასის მოსწავლეები გუნდური პრინციპით მონაწილეობენ.

ჩემპიონატი ორი ეტაპისგან შედგება. პირველ ტურში გამოვლინდება საუკეთესო 69 გუნდი (თითო გუნდი თითო მუნიციპალიტეტიდან), რომლებიც საქართველოს ჩემპიონის ტიტულის მოსაპოვებლად ერთმანეთს თბილისში, 9 ივნისს შეხვდებიან. გამარჯვებული გუნდები სოლიდური პრიზებითა და დიპლომებით დაჯილდოვდებიან.

ტურნირს თვალს ადევნებს „რა? სად? როდის?" მოთამაშე ყველა ქვეყნის საორგანიზაციო კომიტეტის წარმომადგენელი.

„ინტელექტის დღე“ 12:00 სთ-ზე დაიწყება.

Internet.ge