შრომის, ჯანმრთელობისა და სოციალური დაცვის მინისტრმა ბავშვთა სახლის ყოფილი აღსაზრდელები მოინახულა. ახალგაზრდები ერეკლე მეორეს ქუჩაზე განლაგებულ რესტორანსა და ლაუნჯ-ბარში "Re Life" სამუშაო პრაქტიკას გადიან.

მინისტრმა დასაქმებულები გაიცნო და მათი სამუშაო გარემო დაათვალიერა. ისინი გლდანის კრიზისული ცენტრის, რუსთავის ბავშვთა სახლისა და ავლაბრის „მომავლის სახლის" ყოფილი აღსაზრდელები არიან.

„მნიშვნელოვანია, რომ ბავშვთა სახლების დატოვების შემდეგ, ახალგაზრდებმა პროფესიული განათლება მიიღონ და დასაქმდნენ. ისინი ჩვენი საზოგადოების სრულფასოვანი, აქტიური და საუკეთესო წევრები უნდა გახდნენ. თითოეული ჩვენგანის ვალია დავეხმაროთ მათ აღნიშნული მიზნის მიღწევაში," - განაცხადა ზურაბ ჭიაბერაშვილმა.

2011 წლის ნოემბერში ასოციაცია "Life Chance"-მა, გერმანიის საელჩოს დახმარებით, სოციალური საწარმო "Re Life" დააფუძნა. მისი მიზანია, დაეხმაროს ბავშვთა სახლის ყოფილ აღსაზრდელებს, შეიძინონ სრულფასოვანი პროფესია და მიიღონ გრძელვადიანი დასაქმების შანსი.

Internet.ge