დღეს, სპორტისა და ახალგაზრდობის საქმეთა სამინისტროში, ვლადიმერ ვარძელაშვილმა და გაეროს ბავშვთა ფონდის ხელმძღვანელმა რულანდ მონაშმა, ხელი მოაწერეს ხელშეკრულებას, რომელიც 2012 წელს, ახალგაზრდულ სფეროში განსახორციელებელი პროგრამების ფინანსურ მხარდაჭერას ითვალისწინებს.

ხელშეკრულების თანახმად, გაეროს ბავშვთა ფონდი დააფინანსებს საქართველოს ახალგაზრდული პოლიტიკის ფარგლებში სამოქმედო გეგმის ღონისძიებებს, რომლებიც დაკავშირებულია ჯანდაცვის, დასაქმების, სამოქალაქო აქტიურობის, არაფორმალური განათლებისა და სხვა სფეროებთან.

„გაეროს ბავშვთა ფონდისთვის ახალგაზრდობა პრიორიტეტული სფეროა. სამინისტრო არის ჩვენი მნიშვნელოვანი პარტნიორი, რომელთანაც დღეს ხელი მოვაწერეთ სამოქმედო გეგმის ხელშეკრულებას. დოკუმენტის ფარგლებში, გაეროს ბავშვთა ფონდი მხარს უჭერს საქართველოში ახალგაზრდული პოლიტიკის განვითარებას. ვიმედოვნებთ, ჩვენი ერთობლივი ძალისხმევა დადებითად აისახება საქართველოს ახალგაზრდობაზე,“ - განაცხადა მონაშმა.

გაეროს ბავშვთა ფონდი სამინისტროსთან 2010 წლიდან თანამშრომლობს. ამ ხნის განმავლობაში ფონდმა სამინისტროს მიერ ინიცირებული რამდენიმე პროექტი დააფინანსა, მათ შორის, ახალგაზრდული სერვისების მონაცემთა ბაზის შექმნა.

internet.ge