ჩეხეთის საელჩოში, თუშეთის ეროვნული პარკის ვებ-გვერდის  - www.tushetinationalpark.com პრეზენტაცია გაიმართა, რომელსაც გარემოს დაცვის მინისტრი გოგა ხაჩიძე, ჩეხეთის ელჩი ივან იესტრაბი და დაცული ტერიტორიების სააგენტოს თავჯდომარე გიორგი შონვაძე ესწრებოდნენ.

თუშეთის დაცული ტერიტორიების ვებ-გვერდი ხელს შეუწყობს ეროვნული პარკის პოპულარიზაციას და ეკო-ტურიზმის განვითარებას. ვებ-გვერდი ჩეხეთის მთავრობის ფინანსური მხარდაჭერით შეიქმნა.

„ჩეხეთის საელჩოესთან ჩვენს სამინისტროს აქვს დიდი ხნის სანიმუშო თანამშრომლობა გარემოს დაცვის კუთხით. მინდა, რომ დიდი მადლობა გადავუხადო ჩეხეთის მთავრობას და ყველას, ვინც ამ პროექტში მონაწილეობდა. ეს საიტი დაეხმარება ერთის მხრივ ტურისტს, რომ მიიღოს ამომწურავი ინფორმაცია თუშეთის შესახებ, სწორად დაგეგმოს მოგზაურობა და მეორეს მხრივ ჩვენ, რომ გავიგოთ, რა უფრო აინტერესებს ტურისტს. თუშეთი არის ჩვენი სიამაყე. წელს, 7 ივლისს, არის თუშეთობა და ყველას გეპატიჟებით თუშეთის ეროვნულ პარკში. ეს არის უნიკალური ზეიმი, როგორც ელჩმა აღნიშნა „ერთ-ერთ ბოლო სამოთხე დედამიწაზე," - განაცხადა გოგა ხაჩიძემ.

ღონისძიებაზე თუშეთის ეროვნული პარკის ფოტოები და საინფორმაციო მასალა იყო წარმოდგენილი.

„ვებ-გვერდი სასარგებლო იქნება როგორც უცხოელი ტურისტებისთვის, ისე ადგილობრივი მოსახლეობისთვის. ჩეხეთიდან ბევრი ტურისტი ჩამოდის თუშეთში და ვებ-გვერდი ხელს შეუწყობს ეროვნული პარკის პოპულარიზაციას და ეკო-ტურიზმის განვითარებას. ეს არის ორ ქყვენას შორის, განსაკუთრებით კი გარემოს დაცვის სამინისტროსთან მჭიდრო თანამშრომლობის ნაწილი," - განაცხადა ჩეხეთის ელჩმა ივან იესტრაბმა.

ვებ-გვერდის გარდა, ჩეხეთის მთავრობამ ორ ქვეყანას შორის თანამშრომლობის განვითარების ფარგლებში დააფინანსა ჰელიო სისტემების პროექტი "განახლებადი ენერგია საქართველოს განაპირა რეგიონებისთვის - მზის ბატარეების სისტემა თუშეთში", რომლის შედეგადაც 62 ადგილობრივი ოჯახი უზრუნველყოფილია მზის ენერგომომარაგების სისტემით. პროექტის მიმდინარე მეორე ფაზა კი - მოიცავს ადგილობრივების უზრუნველყოფას წყლის გამაცხელებელი მზის სისტემებით.

internet.ge