ბავშვთა დაცვის დღესთან დაკავშირებით, იუსტიციის სამინისტროს წარმომადგენლებმა, არასრულწლოვანთა შორის დანაშაულის პრევენციის, კანონთან კონფლიქტში მყოფი არასრულწლოვნების რეაბილიტაციისა და საზოგადოებაში ინტეგრაციის მხარდამჭერი საგრანტო პროგრამის გამარჯვებული ორგანიზაციის წევრებთან, სამუშაო შეხვედრა გამართეს.

„წამების მსხვერპლთა ფსიქო-სოციალური და სამედიცინო რეაბილიტაციის ცენტრი" იუსტიციის სამინისტროს საგრანტო დაფინანსებით პროექტს ქალაქ ბათუმში ახორციელებს.

პროგრამის ფარგლებში ორგანიზაცია ერთი წლის მანძილზე შეიმუშავებს მშობელთა პოზიტიური სწავლების პროგრამას, ასწავლის ჯგუფებს მოზარდების  ქცევითი და ემოციური პრობლემების იდენტიფიკაციას, ეფექტურ კომუნიკაციას ქცევითი პრობლემების მქონე მოზარდებთან, კრიზისულ სიტუაციებში პრობლემაზე ადექვატურ  რეაგირებას,  რაც ხელს შეუწყობს ქვეყნის მასშტაბით დანაშაულის პრევენციას.

დღევანდელ შეხვედრაზე „წამების მსხვერპლთა ფსიქოსოციალური და სამედიცინო რეაბილიტაციის ცენტრმა" კონკრეტული აქტივობები წარმოადგინა, რომელთა განხორციელებასაც ის უახლოეს მომავალში გეგმავს. კერძოდ, დაგეგმილია მრგვალი მაგიდა მშობლების მონაწილეობით, ლექცია-სემინარების მოწყობა, პროექტის ფარგლებში მომზადებას 30 მშობელი გაივლის.

ახალგაზრდული პროექტები - იუსტიციის სამინისტროს ერთ-ერთი პრიორიტეტია, არასრულწლოვანთა დანაშაულის პრევენციის მიზნით უწყება ახორციელებს პროგრამებს: „ჩემი უფროს მეგობარი," „ჩვენი საზოგადოება", „ლიდერთა სკოლა", „არჩევანი შენზეა", „არასრულწლოვანთა განრიდება და მედიაცია". მათი ნაწილი კანონთან  კონფლიქტში მყოფი მოზარდების რეაბილირტაციას ისახავს მიზნად, ნაწილი კი მიმართულია - ახალგაზრდა თაობის ჩართულობისაკენ საზოგადოებრივ აქტივობებში, მათი ინფორმირებულობისაკენ ქვეყანაში მიმდინარე პროცესებში, რთულ და წინააღმდეგობრივ ასაკში სწორი პრიორიტეტებისა და ორიენტირების ჩამოყალიბებისაკენ.

ამ საქმიანობაში საზოგადოებისა და არასამთავრობო ორგანიზაცების მოზიდვის მიზნით, იუსტიციის სამინისტრომ რამდენიმე საგრანტო კონკურსი გამოაცხადა, რომელთა  ფარგლებშიც გამარჯვებული არასამთავრობო ორგანიზაციები იუსტიციის სამინისტროს მხარდაჭერით, დანაშაულის პრევენციისათვის პროგრამების დაგეგმვასა და განხორციელებას შეძლებენ.

არასრულწლოვანთა შორის დანაშაულის პრევენციის, კანონთან კონფლიქტში მყოფი არასრულწლოვნების რეაბილიტაციისა და საზოგადოებაში ინტეგრაციის მხარდაჭერის მიზნით, საგრანტო კონკურსი იუსტიციის სამინისტრომ 2012 წლის 5 იანვარს გამოაცხადა, გამარჯვებული 8 ორგანიზაცია კი  21 თებერვალს გამოვლინდა.

საგრანტო კომპონენტის განხორციელების უფლება იუსტიციის სამინისტროს 2012 წლის იანვრიდან მიენიჭა.

internet.ge