პოლონეთის ხელისუფლება არ მიიჩნევს საჭიროდ სმოლენსკის კატასტროფის ხელახლა გამოძიებას, რადგან თვლის, რომ ყველაფერი უკვე გარკვეულია. ოფიციალური ვარშავა არ იზიარებს დაღუპული პრეზიდენტის, ლეხ კაჩინსკის ქალიშვილის ეჭვებს, რომელიც მან ევროპელ დეპუტატებს გუშინ გააცნო.

პოლონეთის გენერალური პროკურატურა სასწრაფოდ გამოეხმაურა ევროპარლამენტში სმოლენსკის ტრაგედიასთან დაკავშირებით გამართულ ღია მოსმენას, რომელზეც ავიაკატასტროფის შედეგად დაღუპული პრეზიდენტ ლეხ კაჩინკსის ქალიშვილმა, მარტა კაჩინსკაიამ და ძმამ, იაროსლავ კაჩინსკიმ უნდობლობა გამოუცხადეს კატასტროფის მიზეზების ოფიციალურ ვერსიას და უკვე მერამდენედ განაცხადეს, რომ სმოლენსკის ტრაგედია უფრო ტერაქტს ჰგავს.

პოლონეთის გენერალურმა პროკურორმა, ანჟეი სერემეტმა, ამასთან დაკავშირებით განაცხადა, რომ „ჩვენ ვერ აღმოვაჩინეთ ვერანაირი მტკიცებულება იმისა, რომ ეს კატასტროფა იყო ტერაქტი ან პოლიტიკური მკვლელობა“.

როგორც ცნობილია, მარტა კაჩინსკაიამ ევროპარლამენტს საერთაშორისო კომისიის შექმნა და კატასტროფის ნამდვილი მიზეზების გამოძიება სთხოვა. ის, ისევე როგორც სხვა დაღუპული პირების ოჯახები მიიჩნევს, რომ პოლონური და რუსული მხარეების მიერ ჩატარებულ გამოძიებებსა და დასკვნებში ბევრი რამ ბადებს ეჭვს.