დიდი ბრიტანეთის დედოფლის ელისაბედ II 60 წლიანი მმართველობისადმი მიძღვნილი სამდღიანი ზეიმის ფარგლებში გრანდიოზული კონცერტი გაიმართა. ღონისძიება ბუკინგემის სასახლეში, ღია ცის ქვეშ მოეწყო. დედოფალი მას შვილებთან და შვილიშვილებთან ერთად დაესწრო.

ვარსკვლავურ კონცერტზე კენჭისყრის პრინციპით უფასოდ 10 ათასი ბილეთი დარიგდა.

დედოფალ ვიქტორიას ძეგლის ირგვლივ მოწყობილ სცენაზე ერთიმეორის მიყოლებით ჩნდებოდნენ ცნობილი მომღერლები: სტივ უანდერი, კაილი მინოუგი, რობი უილიამსი, შირლი ბესი, ასევე, ბრიტანელი „რაინდები“ - პოლ მაკარტნი, ელტონ ჯონი და კლიფ რიჩარდი.

კონცერტის დასრულებისთანავე დედოფალმა სპეციალური ჩირაღდანი აანთო. დანარჩენი 4499 ასეთი ჩირაღდანი აინთო მსოფლიოს სხვადასხვა კუთხეში - არა მხოლოდ ლონდონის თაუერის კოშკზე და ინგლისისა და შოტლანდიის სამეფო რეზიდენციებში, არამედ კენიის სასტუმროშიც, სადაც 60 წლის წინ დედოფალმა მამამისის გარდაცვალების შესახებ შეიტყო.

ღონისძიება გრანდიოზული ფეიერვერკით დაგვირგვინდა.

დედოფლის იუბილისადმი მიძღვნილი ღონისძიებები დღეს, ლონდონის ქუჩებში ელისაბედ II ოქროს კარეტით გასეირნებით დასრულდება.

Internet.ge