„ჯანმრთელობის დაცვის შესახებ“ კანონში ცვლილება შედის, რომლის მიხედვით, უშვილო წყვილსა და სუროგატ დედას, მათ უფლება-მოვალეობებთან დაკავშირებით, შესაძლოა ხელშეკრულების დადება მოუწიოთ.

პროექტის ინიცირება ბიურის გუშინდელ სხდომაზე მოხდა, ცვლილებების ავტორი კი, პარლამენტის ჯანდაცვის კომიტეტია.

პროექტით, საქართველოში სუროგაციის გამოყენების შესაძლებლობა მხოლოდ რეგისტრირებულ ქორწინებაში მყოფ უშვილო წყვილს ექნება. 

ცვლილებებით, დადგენილი იქნება უშვილო წყვილის ვალდებულება – აანაზღაუროს ხარჯები, რომლებიც დაკავშირებულია ხელოვნური ჩასახვის ტექნოლოგიების განხორციელებასთან და სუროგატი დედისთვის კანონით დადგენილი წესით სამედიცინო გამოკვლევების ჩატარებასთან.

ასევე, წყვილმა უნდა აანაზღაუროს – სუროგატული დედის ორსულობასთან, მშობიარობასთან, მშობიარობის შემდგომ პერიოდთან დაკავშირებული სამედიცინო მომსახურებასა და დაბადებული ბავშვის სამშობიაროში მოვლასთან და მკურნალობასთან დაკავშირებული ხარჯები, სუროგაციის ხელშეკრულების გაფორმებისათვის აუცილებელი იურიდიული და სხვა მომსახურებისათვის არსებული ხარჯები, სუროგაციასთან დაკავშირებული ნებისმიერი სხვა ხარჯი, მათ შორის შესაძლო შემოსავლის დანაკარგი, თუ ანაზღაურება სუროგატი დედის მიერ ფინანსურ მოგებას არ გულისხმობს.

ამას გარდა, კანონპროექტით, უშვილო წყვილი ვალდებული იქნება სუროგატული დედის ვინაობის შესახებ ინფორმაციის კონფიდენციალურობა დაიცვას, როგორც ბავშვის დაბადებამდე, ისე მის შემდეგ, თუ ამას სუროგატული დედა მოითხოვს.  

internet.ge