თბილისში, „კიბოს კვლევის ცენტრი - მარტინ აბელოფის ლაბორატორია“ გაიხსნა, რომელიც ულტრათანამედროვე სამედიცინო აპარატურითა და ლაბორატორიით არის აღჭურვილი.

აღნიშნული კვლევის ცენტრი დღეს, შრომის, ჯანმრთელობისა და სოციალური დაცვის მინისტრმა ზურაბ ჭიაბერაშვილმა გახსნა და იქ დასაქმებულ მედპერსონალს ჯანდაცვის რეფორმის მიმართულებები პირადად გააცნო.

ცენტრში პაციენტები ქიმიოთერაპიული, ჰორმონოთერაპიული მკურნალობის ჩატარებას შეძლებენ და ქიმიოთერაპევტებთან ერთად პაციენტების მკურნალობის პროცესში ჩართულები იქნებიან ფსიქოლოგებიც.

ამასთან, ცენტრში შესაძლებელი იქნება ქიმიოსენსიტიური კვლევის მეთოდით (CCDRT) პაციენტებისათვის ქიმიოთერაპიის კურსის ინდივიდუალური შერჩევა.

აღსანიშნავია, რომ მსოფლიოში მხოლოდ რამდენიმე ლაბორატორია არსებობს, სადაც მსგავსი კვლევა ტარდება. 

ყოველწლიურად საქართველოში სიმსივნით დაავადების 1000-მდე ახალი შემთხვევა აღირიცხება. აქედან, დაახლოებით 200 პაციენტი დიაგნოზის დადგენიდან 1-3 წელიწადში იღუპება. თუმცა, დღეს უკვე არსებობს ტექნოლოგიები, რომლებიც სიმსივნესთან ეფექტური ბრძოლის და მისგან განკურნების შანსს მნიშვნელოვნად ზრდის.

internet.ge