რუსეთის საგამოძიებო კომიტეტის თავმჯდომარის მუქარის გამო „ნოვაია გაზეტას“ რედაქტორის მოადგილე სერგეი სოკოლოვი იძულებული გახდა რუსეთიდან წასულიყო, რადგანაც ალექსანდრე ბასტრიკინი მას ფიზიკური ანგარიშსწორებით დაემუქრა და თან იცინოდა, რომ თავად გამოიძიებდა მისი მკვლელობის საქმეს - წერს რუსული მედია.

სკანდალი ბასტრიკინსა და სოკოლოვს შორის „ნოვაია გაზეტაში“ გამოქვეყნებული სტატიით დაიწყო,  რომელშიც სოკოლოვი ერთ-ერთი საქმის გამოძიებაზე წერდა და აცხადებდა, რომ კუშევსკის ბანდის მეთაურს სერგეი ცაპკას ჯარიმად მხოლოდ 150 ათასი რუბლი იმიტომ დააკისრეს, რომ დანაშაულებრივ ჯგუფს ძალოვნები მფარველობდნენ.

ამის პასუხად ბასტრიკინმა მუქარის გზა აირჩია, ჟურნალისტი ბასტრიკინის დაცვამ მოსკოვის სიახლოვეს ტყეში წაიყვანა, სადაც მას საგამოძიებო კომიტეტის ხელმძღვანელი ელოდებოდა. როგორც „ნოვაია გაზეტას“ მთავარი რედაქტორი დიმიტრი მურატოვი თავის ღია წერილში სწერს ბასტრიკინს, „თქვენ უხეშად დაემუქრეთ ჩემს მოადგილეს და იხუმრეთ კიდეც, რომ ამ საქმეს მერე თავადვე გამოიძიებთ“.

მურატოვის თქმით, ბასტრიკინი ტყეში საუბრისას „ნოვაია გაზეტას“ მთელ გუნდზე და მათ შორის მოკლულ ჟურნალისტს ანა პოლიტკოვსკაიაზეც სხვადასხვა ეპითეტებით საუბრობდა.

მურატოვი რედაქციის თანამშრომლების უსაფრთხოებას მოითხოვს, სოკოლოვმა კი რუსეთი სწორედ მისი თხოვნით დატოვა, რადგან ჟურნალისტის სიცოცხლეს შეიძლება საფრთხე დაემუქროს.

Internet.ge