დღეს, 17:00 სთ-ზე, საქართველოს ტექნიკური უნივერსიტეტის ადმინისტრაციული კორპუსის სააქტო დარბაზში  „უნივერსიადა 2012“-ის საზეიმო დახურვის ცერემონიალი გაიმართება.

დაჯილდოებაზე უნივერსიადაში გამარჯვებულ საუკეთესო 3 უნივერსიტეტს თასი, დიპლომები და ფასიანი საჩუქრები გადაეცემა.

საღამოს ნიკა ქავთარაძე გაუძღვება, მუსიკალურ ნომრებს ნინი შერმადინი და სხვა მომღერლები შეასრულებენ. დაჯილდოების ცერემონიას სპორტისა და ახალგაზრდობის საქმეთა მინისტრი - ვლადიმერ ვარძელაშვილი დაესწრება. მასთან ერთად გამარჯვებულებს პრიზებს საუნივერსიტეტო სპორტის ფედერაციის პრეზიდენტი - ნიკოლოზ ამაშუკელი გადასცემს.

„უნივერსიადა - 2012“-ის  ორგანიზატორი საუნივერსიტეტო სპორტის ფედერაცია იყო, მხარდამჭერი - სპორტისა და ახალგაზრდობის საქმეთა სამინისტრო, ხოლო შეჯიბრების გენერალური სპონსორი „სოკარ ჯორჯია პეტროლიუმი“ გახლდათ. შეჯიბრება 5 მაისს დაიწყო და 11 ივნისამდე გაგრძელდა.

ტურნირში, რომელშიც საქართველოს უმაღლესი სასწავლებლების სტუდენტები გამოდიოდნენ, გამარჯვებულები სპორტის 22 სახეობაში გამოვლინდნენ. გუნდურ ჩათვლაში 27 ოქროს,  14 ვერცხლის და  17 ბრინჯაოს მედლით, „უნივერსიადა 2012“-ის გამარჯვებული ტექნიკური უნივერსიტეტი გახდა.

internet.ge