პოლონეთის პოლიცია დღეს დაგეგმილი რუსეთ-საბერძნეთის საფეხბურთო მატჩისთვის განსაკუთრებულად ემზადება, რათა არ დაუშვას არეულობები.

სიტუაციას  10 ათასი წესრიგის დამცველი გააკონტროლებს. სავარაუდოდ, ეს იქნება ადგილობრივი პოლიციისა და რუს სამართალდამცველთა ერთობლივი რეიდები. ვარაუდობენ, რომ მატჩზე დასასწრებად „ფეხბურთის ხულიგნები“ მთელი პოლონეთიდან ჩავლენ, რუსი ფანატები კი ბელორუსის, უკრაინისა და ჩეხეთის ტერიტორიიდან.

როგორც ცნობილია, ევრო-2012 პოლონეთში ინცინდენტების ფონზე მიმდინარეობს. აგრესიაში რუს გულშემატკივრებს არც პოლონელი ფანატები ჩამოუვარდებიან. 12 ივნისს მათ შორის მომხდარი ჩხუბის შედეგად 148 ადამიანი დააკავეს.

დღესვე ცნობილი გახდა, რომ ვლადიმერ პუტინმა პოლონეთის პრემიერს დონალდ ტუსკს დაურეკა და ურჩია, ფრთხილად იყვნენ, რადგან რუსი ფანატებისგან  12 ივნისის ინცინდენტის გამო, შესაძლოა, შურისძიება იყოს მოსალოდნელი.