დღეს, საქართველოს პარლამენტის ეროვნულმა ბიბლიოთეკამ ქვეყნის სხვადასხვა რეგიონიდან ჩამოსულ დევნილ ბავშვებს უმასპინძლა. ღონისძიებაში გაეროს ლტოლვილთა საქმეების უმაღლესი კომისარიატიც იყო ჩართული.

დევნილ ბავშვებს ბიბლიოთეკის შენობებში ექსკურსია ჩაუტარდათ, შემდეგ კი ზაალ სულაკაურის ხატვის გაკვეთილს დაესწრნენ. დღის განმავლობაში ისინი ქართველ მწერლებს - თეა თოფურიასა და დავით დეფის შეხვდნენ, რის შემდეგაც დევნილთა საკითხზე ჩატარებულ ლექციასაც დაესწრნენ.

ბავშვებს ეროვნული ბიბლიოთეკის აუდიტორიაში პირველი ქართული დოკუმენტური ფილმის „აკაკის მოგზაურობა რაჭა-ლეჩხუმში 1912 წელს“ ნახვის საშუალებაც მიეცათ. ფილმის დასრულების შემდეგ საგამოფენო დარბაზში მათთვის კონცერტი გაიმართა.

ღონისძიებების დასასრულს „პალიტრა L“-მა იძულებით გადაადგილებულ ბავშვებს საჩუქრად თავისი გამოცემები გადასცა.

Internet.ge