კოალიცია „ქართული ოცნების“ ლიდერს სასამართლოს მიერ დაკისრებული ჯარიმის გადახდის ვადა 19 ივნისს, დღის ბოლოს ამოეწურა.

ივანიშვილმა განაცახადა, რომ აღნიშნული ჯარიმის გადახდას არ აპირებს.

კანონით, თანხის გადაუხდელობის შემთხვევაში კონტროლის პალატამ აღსრულების ფურცლით სასამართლოს უნდა მიმართოს, რის შემდეგაც საქმეში აღსრულების ეროვნული ბიურო ჩაერთვება.

იმის გათვალისწინებით, რომ კოალიციის ლიდერი კონტროლის პალატის მიერ დაკისრებული ჯარიმის გადახდას არ აპირებს, აღსრულების ბიურო გადაწყვეტს იძულების რა გზით უნდა ამოიღოს აღნიშნული თანხა.

„ინტერნეტ.ჯი“-სთან საუბრისას აღსრულების ეროვნული ბიუროს ხელმძღვანელმა ნიკა მელიამ განაცხადა, რომ ამ ეტაპზე მათ უწყებაში არ მიდის მსჯელობა დაუყადაღებენ თუ არა ბიძინა ივანიშვილს ქონებას.

„ჯერჯერობით ვერ გეტყვით რა ზომებს მიიღებს აღსრულების ეროვნული ბიურო. გააჩნია სამართლებრივ საქმეს. დეტალები იქნება შესამოწმებელი. რა თქმა უნდა, კანონით შესაძლებელია, რომ ბიძინა ივანიშვილის ქონებას ყადაღა დაედოს. წინასწარ ვერაფერს გეტყვით, ვინაიდან კონკრეტული საქმე არ არის. ამ საკითხზე მსჯელობა იქნება მაშინ, როდესაც საქმე წარმოებაში გვექნება მიღებული, რომლის მიხედვითაც ვიხელმძღვანელებთ“ - განაცხადა აღსრულების ეროვნული ბიუროს ხელმძღვანელმა.

შეგახსენებთ, რომ კონტროლის პალატამ ივანიშვილი სამართალდამრღვევ სუბიექტად სცნო და საერთო ჯამში 148 650 131 ლარით დააჯარიმა.

ივანიშვილის ადვოკატებმა ეს გადაწყვეტილება სააპელაციო სასამართლოში გაასაჩივრეს, მოსამართლის გადაწყვეტილებით კი დაკისრებული ჯარიმა  შემცირდა და  74 325 065 ლარი შეადგინა.

internet.ge