განათლების სამინისტროს ინფორმაციით, 2012 წლის ერთიან ეროვნული გამოცდების ჩასატარებლად საქართველოს მასშტაბით 17 საგამოცდო ცენტრი გაიხსნება.

ვიდეოთვალების დამონტაჟება აუდიტორიებში უკვე დაიწყო. რამდენიმე დღეში ყველა საგამოცდო ცენტრი აღიჭურვება ავეჯით და სხვა საჭირო ინვენტარით. 

წელს, საგამოცდო ცენტრებისთვის 850-მდე ვიდეოთვალი და 9000-ზე მეტი მერხი გამოიყო. საგამოცდო პროცესს 13000-მდე კურატორი და დამკვირვებელი ეყოლება.

საგამოცდო ცენტრები 12 ქალაქში იხსნება. წელს საგამოცდო ცენტრების შენობები თბილისში, ქუთაისსა და ფოთში შეიცვალა.

ახალი ცენტრების შერჩევისას მთავარი კრიტერიუმი მონაწილეთათვის მაქსიმალურად კომფორტული გარემოს შექმნის შესაძლებლობაა.

ერთიანი ეროვნული გამოცდები აბიტურიენტებისთვის 28 ივნისს და პედაგოგებისთვის 2 ივლისს დაიწყება. გამოცდების საბოლოო შედეგები 25 აგვისტოს გახდება ცნობილი.

2012 წლის ერთიან ეროვნულ გამოცდებზე 35 000-ზე მეტი აბიტურიენტი და გრანტის გაუმჯობესების მიზნით 5000-მდე სტუდენტი დარეგისტრირდა. სასერტიფიკაციო გამოცდას 4000-მდე მასწავლებელი გაივლის, ხოლო სამაგისტრო გამოცდას დაახლოებით 7500 სტუდენტი ჩააბარებს.

დეტალური ინფორმაცია გამოცდების განრიგის შესახებ განთავსებულია ვებგვერდზე: www.naec.ge.

internet.ge