დღეს, საქართველოში რეგისტრირებულ უცხო ქვეყნის მოქალაქე ლტოლვილთა ყოველწლიური, სავალდებულო რეგისტრაცია იწყება. აღნიშნული პროცედურა "ლტოლვილთა და ჰუმანიტარული სტატუსების შესახებ“ საქართველოს კანონისა და საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის კობა სუბელიანის N 53 ბრძანების შესაბამისად განხორციელდება.

სამინისტროს მიერ გავრცელებულ განცხადებაში ნათქვამია, რომ  „Prima facie“-ს პრინციპით ლტოლვილის სტატუსის მქონე პირთათვის რეგისტრაცია 2012 წლის 25 ივნისიდან 30 ივნისის ჩათვლით ახმეტის მუნიციპალიტეტის სოფელ დუისში მდებარე სამინისტროს დროებითი წარმომადგენლობის შენობაში იწარმოებს. გარდა ამისა, „Prima facie“-ს პრინციპითა და ინდივიდუალურად მინიჭებული ლტოლვილის სტატუსის მქონე პირთათვის 2012 წლის 1 ივლისიდან 31 ივლისის ჩათვლით რეგისტრაცია განხორციელდება თბილისში, საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს შენობაში.

ლტოლვილის სტატუსის მქონე პირები, რომლებიც საპატიო მიზეზით ვერ გაივლიან რეგისტრაციას ზემოაღნიშნულ ვადებში და მისამართებზე, ვალდებულები არიან, სამინისტროს შენობაში 2012 წლის 1 აგვისტოდან 31 აგვისტოს ჩათვლით გამოცხადნენ.

Internet.ge