„ქართულ ოცნებაში“ შემავალი პარტიების მიერ დაკისრებული ჯარიმის გადაუხდელობის შეთხვევაში აღსრულების ეროვნულ ბიუროს აქვს კანონით მინიჭებული უფლება, რომ აღნიშნული პარტიების ფინანსებს ყადაღა დაადოს, ქონება კი აუქციონზე გაიტანოს. ამის შესახებ „ინტერნეტ.ჯი“-ს კოალიციის ადვოკატმა სანდრო ბარამიძემ განუცხადა.

„ვინაიდან აღნიშნული პოლიტიკური პარტიები ჯარიმის გადახდას არ აპირებენ, უკვე ხვალიდან იძულებითი აღსრულების პროცედურა დაიწყება, რა ფორმით გააკეთებს ამას ბიურო ეს ნამდვილად არ ვიცი“,- განაცხადა ბარამიძემ.

კოალიცია "ქართულ ოცნებაში" შემავალი პარტიების დაჯარიმების გადაწყვეტილება თბილისის საქალაქო სასამართლომ კონტროლის პალატის ოქმის საფუძველზე მიიღო.

მოსამართლე ილონა თოდუას გადაწყვეტილებით, აღნიშნული პარტიები 2 383 097 ლარით დაჯარიმდნენ. სააპელაციო სასამართლომ ეს გადაწყვეტილება ძალაში დატოვა.

internet.ge