სასჯელაღსრულების, პრობაციისა და იურიდიული დახმარების საკითხთა მინისტრი ხათუნა კალმახელიძე, პროფესიული განათლების  დამადასტურებელი სერთიფიკატების გადაცემას, ვიცე-სპიკერ რუსუდან კერვალიშვილთან ერთად, №5 ქალთა სასჯელაღსრულების დაწესებულებაში დაესწრო.

სერთიფიკატები ქალ მსჯავრდებულებს არტ ფლორა - დიზაინის წარმატებით დასრულებისათვის გადაეცათ, რაც მცენარეებისგან სხვადასხვა კომპოზიციის შექმნას გულისხმობს.

სამინისტროს ინფორმაციით, საგანმანათლებლო ცენტრში, რომელიც ახლადგახსნილი, ბიბლიოთეკის ფარგლებში დაარსდა,  ქალ მსჯავრდებულებს  საშუალება აქვთ  შეისწავლონ უცხო ენები და  ჩაერთონ სხვა ფსიქო-სარეაბილიტაციო პროგრამებში.

პროექტი, რომელიც  „სამოქალაქო ცნობიერების განვითარების ცენტრის“ მხარდაჭერით ხორციელდება, მსჯავრდებულ ქალთა  განათლების, სწავლის გაგრძელების და გათავისუფლების შემდგომ დასაქმების  ხელშეწყობას ემსახურება.

ქალთა დაწესებულებაში არსებული უმაღლესი  სტანდარტის  ბიბლიოთეკა, რომელიც სპეციალური ტექნიკით, ქართულ და უცხო ენებზე გამოცემული მხატვრული, ისტორიული და სხვადასხვა ჟანრის ლიტერატურითაა აღჭურვილი, ქალი მსჯავრდებულების რეაბილიტაციას და მათ პროფესიულ განათლებას უწყობს ხელს.

internet.ge