რუსეთში, კრასნოდარის მხარეში, ძლიერი წვიმებისა და უამინდობის შედეგად 10 ადამიანი დაიღუპა. წყალმა დაფარა ქალაქის საავადმყოფოები და ბავშვთა ტუბერკულოზის ამბულატორია. სოფელ დივნომორში 80-მდე სახლი დაიტბორა, რის გამოც 320 ადამიანი ევაკუირებულია.

გელენჯიკში მეხის დაცემის გამო ტრანსფორმატორი ჩამოვარდა, რასაც 5 ადამიანის სიცოცხლე ემსხვერპლა. გარდა ამისა, ჩამონგრეული სახლების გაწმენდითი სამუშაოებისას ნანგრევებს შორის 2 გარდაცვლილიც აღმოაჩინეს.

„სტიქიის შედეგებთან საბრძოლველად კრასნოდარის მხარეში ავარიულ-სამაშველო სამუშაოებისთვის 500-ზე მეტი სპეციალისტი და 104 ერთეული ტექნიკაა მობილიზებული,“ - განაცხადა რუსეთის საგანგებო სიტუაციების სამინისტროს წარმომადგენელმა.

ამ დროისთვის, სტიქიის მიმდებარე რაიონებში სულ 320-მდე სახლია დატბორილი, სადაც ათასზე მეტი მოსახლე ცხოვრობს. ამ მხარეში დაზიანებულია ენერგომომარაგების სისტემა, შეჩერებულია მატარებლების მოძრაობა და შეზღუდულია ავტოტრანსპორტის გადაადგილება.

internet.ge