გამოცდების ეროვნული ცენტრის ყოფილი ხელმძღვანელი მაია მიმინოშვილი კიდევ ერთხელ ირწმუნება, რომ მის ახლად დაარსებულ ორგანიზაციას კოალიცია ქართული ოცნების ლიდერი არ აფინანსებს. ამის შესახებ მიმინოშვილმა განცხადება სოციალური ქსელით გაავრცელა.

 „ბიძინა ივანიშვილი არ არის ჩვენი ორგანიზაციის დამფინანსებელი, არ ვგეგმავ მის პოლიტიკურ მოძრაობაში გაწევრიანებას და არც არასდროს ვყოფილვარ რომელიმე პოლიტიკური პარტიის წევრი. ვაპირებ ისევ განათლების საკითხებზე ვიმუშაო. უკვე წარვადგინეთ შესაბამისი პროექტები საერთაშორისო დონორ ორგანიზაციებში, მომდევნო კვირას კიდევ ორ პროექტს წარვადგენთ. ამ თემებზე ვითანამშრომლებ, ვისაუბრებ თუ ვიკამათებ ყველასთან, ვისთვისაც მნიშვნელოვანია განათლების სფეროს განვითარება და ვისაც ამის სურვილი ექნება. მე და ჩემი კოლეგები ძალიან მადლიერები ვართ ფონდისა „ღია საზოგადოება საქართველო“, რომელმაც საოფისე ფართი დაგვითმო - უახლოეს დღეებში შესაძლებლობა გვექნება განათლების სისტემის მნიშვნელოვან საკითხებზე ჩვენი მოსაზრებები გავუზიაროთ ყველა დაინტერესებულ მოქალაქეს, პედაგოგს, მოსწავლეს, მშობელს, ექსპერტს, არასამთავრობო თუ სამთავრობო ორგანიზაციების წარმომადგენლებს“,- ნათქვამია განცხადებაში.

internet.ge