სახელმწიფო აუდიტის სამსახურის გენერალური აუდიტორის მოადგილე თინა ბოკუჩავამ, სახელმწიფო აუდიტის სამსახურის თბილისის ოფისში პოლიტიკური დაფინანსების მონიტორინგის მეთოდოლოგიის პრეზენტაცია გამართა.

მისი თქმით პროექტი მიზნად ისახავს პოლიტიკური ფინანსების გამჭვირვალობის უზრუნველყოფას.

სახელმწიფო აუდიტის სამსახურის მიზანია საქართველო წარმატებული იყოს პოლიტიკურ კორუფციასთან ბრძოლაში. ჩვენი მიზანია, პოლიტიკური ფინანსები იყოს გამჭვირვალე და პოლიტიკური პარტიები ანგარიშვალდებულნი იყვნენ საზოგადოების წინაშე. ყველა პოლიტიკურმა სუბიექტმა პოლიტიკური საქმიანობისთვის უნდა გამოიყენოს მხოლოდ კანონიერი ფული და არ მოახდინოს ამომრჩველის ხმაზე უკანონო ფინანსებით უსამართლო ზემოქმედება. სწორედ ამიტომ, ბოლო რამდენიმე თვის მანძილზე, სახელმწიფო აუდიტის სამსახური ინტენსიურად მუშაობდა სამოქალაქო სექტორსა და საერთაშორისო ექსპერტებთან, რათა შეგვექმნა დოკუმენტი, რომელიც დეტალურად განმარტავს საქართველოს კანონმდებლობას პოლიტიკური ფინანსების სფეროში“,- განაცხადა ბოკუჩავამ.

მისი თქმით, უწყება მონიტორინგის  პროცესში სამოქალაქო საზოგადოების აქტიურ ჩართულობას მიესალმება.

„დოკუმენტის შემუშავების პროცესში, სახელმწიფო აუდიტის სამსახური კონსულტაციებს აწარმოებდა პოლიტიკურ პარტიებთანაც, რომლებიც ასევე მიესალმებიან ამ წინგადადგმულ ნაბიჯს. პრევენცია ამ დოკუმენტის ყველაზე მნიშვნელოვანი ამოცანაა. პოლიტიკურ პარტიებს წარმოდგენილ დოკუმენტთან ერთად დარღვევების პრევენციაში ასევე დაეხმარება სახელმწიფო აუდიტის სამსახურის ცხელი ხაზი, რომლის მეშვეობით ნებისმიერ პოლიტიკურ სუბიექტს შეუძლია გაიაროს კონსულტაცია ნებისმიერ ფინანსურ საკითხზე. დოკუმენტის პრაქტიკაში დანერგვასთან ერთად, დოკუმენტის შემდგომი დახვეწის მიზნით, სახელმწიფო აუდიტის სამსახური ქმნის საკონსულტაციო საბჭოს, რომლის შემადგენლობაშიც შევლენ, როგორც სამოქალაქო საზოგადოების, ასევე პოლიტიკური პარტიების წარმომადგენლები. სახელმწიფო აუდიტის სამსახური გააგრძელებს ამ მიმართულებით მუშაობას და იმედოვნებს, რომ პოლიტიკური სუბიექტები, სამოქალაქო სექტორი და საქართველოს საზოგადოება გაიზიარებს ამ ძალისხმევას, რომ კიდევ უფრო გამჭვირვალე გახდეს პოლიტიკური პარტიების ფინანსები საქართველოში სამართლიანი არჩევნების უზრუნველსაყოფად და ჯანსაღი პოლიტიკური ცხოვრებისთვის არჩევნების შემდგომ“,- დასძინა სახელმწიფო აუდიტის სამსახურის გენერალური აუდიტორის მოადგილემ.

internet.ge